Պատվաստանյութերի ձեռքբերման ոլորտում անարխիա է

Վերահսկիչ պալատն ուսումնասիրել է ՀՀ գյուղատնտեսության նախարարության «Գյուղատնտեսական կենդանիների պատվաստում» ծրագիրը, ըստ ծրագրի պատվաստանյութերի ձեռքբերման և հակահամաճարակային միջոցառումների իրականացման համար 2014թ. նախատեսվել է 1,120,742.3հազ. դրամ, իսկ 2015թ.՝ 1,162,214.8 հազ. դրամ:

Նշենք, որ իրականացված վերահսկողության ընթացքում բացահայտվել են դեպքեր, երբ համայնքների կողմից հաշվարկված անասնագլխաքանակի վերաբերյալ տեղեկատվությունը չի համապատասխանել տվյալ համայնքում փաստացի առկա անասնագլխաքանակի մասին տվյալներին:

Դաբաղ հիվանդության նկատմամբ մանր եղջերավոր կենդանիներն ամբողջությամբ չեն պատվաստվում, օրինակ՝ առկա են համայնքներ, որտեղ մանր եղջերավոր կենդանիների մի մասը պատվաստվում են, իսկ մյուս մասը` ոչ, այստեղ բացակայում է որևէ տրամաբանություն:

01.01.2014թ. դրությամբ պահեստում առկա են եղել գումարով 35,538.2 հազ. դրամի և 01.01.2015թ-ի դրությամբ՝ 27,286.4 հազ. դրամի պատվաստանյութեր, ախտորոշիչ և լաբորատոր նյութեր, սակայն, դրանք հաշվի չեն առնվել հաջորդ տարվա ծրագրի բյուջեն կազմելու ընթացքում:

Տարեվերջին պահեստում առկա պատվաստանյութերի, ախտորոշիչ և լաբորատոր նյութերի մնացորդները հաշվի չեն առնվել հաջորդ տարվա ծրագրի բյուջեն կազմելու ընթացքում:

ՀՀ գյուղատնտեսության նախարարության կողմից 2014թ. ընթացքում ձեռք են բերվել 578,223.3 հազ. դրամի 14 անվանում, իսկ 2015թ.-ին՝ 567,611.4 հազ. դրամի 13 անվանում հակահամաճարակային պատվաստանյութեր և լաբորատոր նյութեր, ընդամենը 2014-2015թթ. ընթացքում ձեռք են բերվել 1,145,834.7 հազ. դրամի պատվաստանյութեր և լաբորատոր նյութեր:

Պատվաստանյութերի ձեռքբերման նպատակով կայացած մրցույթի շրջանակներում շրջանակային համաձայնագրեր կնքած թվով 3 մասնակիցներ՝ «Ագրոխիմպրոմ» և «Ամասիա» ՍՊԸ-ները, ինչպես նաև ՌԴ «Շչոլկովոյի Բիոկոմբինատ»-ը ներկայացրել են գնային առաջարկներ: Դաբաղի պատվաստանյութի մասով հաղթող ճանաչված «Ագրոխիմպրոմ» ՍՊԸ-ն գնային առաջարկ է ներկայացրել 336,523.2 հազ. դրամի չափով նախահաշվային արժեքը կազմել է 487,615.1 հազ. դրամ կամ տնտեսումը կազմել է 151,091.9 հազ. դրամ:

Հատկանշական է, որ 2014թ-ին դաբաղի պատվաստանյութի մեկ դոզան ձեռք է բերվել 216.5 դրամով, 2015թ-ին՝ 214.4 դրամ, իսկ 2016թ. «Ագրոխիմպրոմ» ՍՊԸ-ն հաղթել է 147.9 դրամով, այսինքն` անհամեմատ ավելի ցածր գնով: Սակայն ՀՀ կառավարության 14.01.2016թ. N 12-Ն որոշման համաձայն Հայաստանի Հանրապետության գյուղատնտեսության նախարարության կարիքների համար գյուղատնտեսական կենդանիների վարակիչ հիվանդությունների դեմ պատվաստումներ կատարելու համար անհրաժեշտ կենսապատվաստուկների և ախտորոշիչ միջոցների ձեռքբերման նպատակով 2015 թվականի նոյեմբերի 19-ին հայտարարված գնման ընթացակարգը հայտարարվել է չկայացած 1-ին չափաբաժնով՝ գնման պահանջի դադարման հիմքով: Այնուհետև բանակցային ընթացակարգի միջոցով իրականացված գնման արդյունքում դաբաղի պատվաստանյութի գինը կազմել է 154.03 դրամ:

ՀՀ գյուղատնտեսության նախարարության «Բիո ՈՒնիվերսալ» ՍՊԸ, ինչպես նաև «Ամասիա» ՍՊԸ-ի միջև կնքված պայմանագրերով նախատեսված պարտավորությունների կատարմանը վերաբերող հարցերը ճշտելու նպատակով «Բիո Ոuնիվերսալ»և «Ամասիա» ՍՊԸ-ներում իրականացվել են հանդիպակաց ստուգումներ:

«Բիո Ունիվերսալ»ՍՊԸ-ում իրականացված հանդիպակաց ստուգմամբ պարզվել է՝ «Բիո Ունիվերսալ» ՍՊԸ–ի և ՀՀ գյուղատնտեսության նախարարության միջև 22.01.2014թ.-ին կնքվել է գյուղատնտեսական կենդանիների վարակիչ հիվանդությունների դեմ պատվաստումներ կատարելու համար անհրաժեշտ դեղամիջոցների և ախտահանիչերի գնման պայմանագիր, ընդհանուր գումարով 460,240.1 հազ. դրամի:

2014թ. «Բիո Ունիվերսալ» ՍՊԸ-ն ՀՀ է ներմուծել 348,151.9 հազ. դրամի պատվաստանյութեր և ՀՀ-ում գրանցված կազմակերպություններից ձեռք է բերել 8,588.3 հազ. դրամի պատվաստանյութեր: «Բիո Ունիվերսալ»ՍՊԸ-ն ՀՀ գյուղատնտեսության նախարարության հետ կնքված համաձայնագրի շրջանակներում պատվաստանյութերը և լաբորատոր նյութերը հանձնել է 460,240.1 հազ. դրամով, այդ թվում ԱԱՀ 76,722.0 հազ. դրամ:

«Ամասիա» ՍՊԸ-ում իրականացված հանդիպակաց ստուգման վերաբերյալ.

ՀՀ վերահսկիչ պալատի նախագահի 2015 թվականի սեպտեմբերի թիվ 23 հրամանի համաձայն «Ամասիա» ՍՊԸ-ի մոտ ՀՀ վերահսկիչ պալատին վերապահված իրավասության սահմաններում ՀՀ գյուղատնտեսության նախարարության և «Ամասիա» ՍՊԸ-ի միջև կնքված պայմանագրով նախատեսված պարտավորությունների կատարմանը վերաբերող հարցերը ճշտելու նպատակով պետք է իրականացվեր հանդիպակաց ստուգում: Վերահսկողություն իրականացնող հանձնաժողովի կողմից վերը նշված հանդիպակաց ստուգման հրամանի շրջանակներում «Ամասիա» ՍՊԸ-ից պահանջվել է տեղեկատվություն:

«Ամասիա» ՍՊԸ-ն խախտելով «Վերահսկիչ պալատի մասին» ՀՀ օրենքի 24-րդ հոդվածի մաս 2-ի բ) և գ) կետերով և նույն հոդվածի մաս 3-ով սահմանված պահանջները, չտրամադրեց վերը նշված փաստաթղթերն ամբողջությամբ, որի արդյունքում կազմվեց խոչընդոտման արձանագրություն:

Ինչ վերաբերում է պատվաստանյութերի որակին, ապա 2014-2015թթ. ընթացքում ՀՀ գյուղատնտեսության նախարարության կողմից ձեռք բերված պատվաստանյութերի որակի ստուգում չի կատարվել, քանի որ ՀՀ-ում բացակայում են որակի ստուգման համապատասխան լաբորատորիաները: Նշված փաստը, ըստ Վերահսկիչ պալատի, մտահոգիչ է և իր մեջ պարունակում է ռիսկեր, քանի որ հետագա ուսումնասիրությունները ցույց են տվել, որ պատվաստանյութերը հավուր պատշաճի չեն պահպանվում, չկան համապատասխան պահոց-սառնարաններ: