ՀՔԾ-ում շարունակվում է Արամ Հարությունյանի կաշառքի գործը

Հատուկ քննչական ծառայությունը դեռևս 2015թ. օգոստոսից քննում է գործարար Սիլվա Համբարձումյանի հաղորդումը, որտեղ նա հայտնել է, որ 2008թ. 10 հանքի շահագործման լիցենզիա ստանալու համար 14 մլն. դոլար կաշառք է տվել Բնապահպանության նախկին նախարար Արամ Հարությունյանին։

Էներգետիկայի և բնական պաշարների նախարար Արմեն Մովսիսյանը կասեցրել էր լիցենզիաները, Արամ Հարությունյանն էլ ձեռքերը լվացել է, ինչից հետո տիկինը դիմել է իրավապահներին։

Ըստ որոշ հրապարակումների` գործով ապացույցներ են ձեռք բերվել, որոնք վկայում են խոշոր չափի գումարի մուտքն ու ելքը։ Այս գործի մասին տեղյակ է նաև Սերժ Սարգսյանը, որը ՀՔԾ-ին հանձնարարել է քննել՝ օրենքի տառը պահպանելով։ Մոտ 1 տարվա քննությունից հետո այժմ նոր զարգացումներ են սպասվում, այդ թվում՝ ձերբակալություններ: Քննիչներն ապացուցել են ութ միլիոն կաշառքի փաստը, որ գործարար Սիլվա Համբարձումյանը տվել է Արամ Հարությունյանին` Դուբայում, վեց միլիոնը` Երևանում:

Կաշառք տալու և ստանալու առնչությամբ Newspress.am-ի հարցմանն ի պատասխան` ՀՔԾ-ից փոխանցեցին, որ Սիլվա Համբարձումյանի հաղորդման հիման վրա Հատուկ քննչական ծառայությունում հարուցված քրեական գործի նախաքննությունը շարունակվում է:

«Քննության այս փուլում նախաքննության գաղտնիքի պահպանության անհրաժեշտությունից ելնելով այլ տեղեկություններ ՀՔԾ-ն հրապարակել չի կարող»,- ասված ՀՔԾ-ի պատասխանում: