Բալասանյանին անգամ մուշուրբան չի օգնի

Հռոմի պապ Ֆրանցիսկոսը շուտով կլինի Հայաստանում, այցելելու է նաև Գյումրի և Վարդանանց հրապարակում պատարագ կմատուցի:

Գյումրիի քաղաքապետ Սամվել Բալասանյանը պատրաստվում է Հռոմի պապին նվիրել գեղանկար ու արծաթե մուշուրբա (բաժակ, որով ջուր խմելու ժամանակ զրնգում է, կլկլում է, այդ պատճառով նաև անվանում են կլկլան): Այն վերջին շրջանում դարձել է Գյումրիի խորհրդանիշը, օտարերկրյա բարձրաստիճան բոլոր հյուրերին մուշուրբա են նվիրում և կարգի բերում այն փողոցները, որտեղով պիտի բարձրաստիճան օտարերկրացի հյուրերն անցնեն: Այդպես եղավ Պուտինի այցի ժամանակ, այժմ էլ Բալասանյանը լծվել է Գյումրիի այն փողոցները կարգի բերելուն, որով պետք է անցնի Հռոմի պապը: Մինչդեռ օրեր առաջ, երբ Գյումրիում էր վարչապետ Հովիկ Աբրահամյանը, Բալասանյանը ոչ հասցրել էր փողոցները կարգի բերել, ոչ մուշուրբան, հավանաբար մտածել էր, որ Հ. Աբրահամյանը «ներսի մարդ» է:

Հովիկ Աբրահամյանը ներսի մարդու կարգավիճակով իր գոհունակությունն էր արտահայտել Սամվել Բալասանյանի աշխատանքից, և վարչապետի գոհ լինելն ուղիղ կապված է սեպտեմբերին կայանալիք Գյումրիի քաղաքապետի ընտրությունների հետ:

Եթե օտարերկրյա հյուրերին քաղաքապետը պիտի պատշաճ ընդունելության արժանացնի, որ հյուրերը գոհ մնան, ներսի բարձրաստիճան հյուրերի համար Բալասանյանը ձայները պետք է ապահովի, որ գոհ մնան:

Սակայն եթե գյումրեցիները չցանկանան, ապա Բալասանյանին ոչ մուշուրբան կօգնի, ոչ էլ կուսակցության սատարանքը: Գյումրիում դեռևս հաշվառված մոտ 2500 անօթևան ընտանիք կա, փողոցները, ինչպես պատգամավորներից մեկն է ասել, թեթև ատլետիկայի չեմպիոն պետք է լինել այդ փողոցներով անցնելու համար, լուծված չէ աշխատատեղերի հարցը և այլն:

Այնպես որ` սեպտեմբերին Բալասանյանին ոչ Հռոմի պապի այցը, ոչ մուշուրբան կօգնի, ոչ էլ Հովիկ Աբրահամյանի գովեստը: Երկրաշարժից 28 տարի անց ունենալ անօթևան բնակիչ, ավերակ քաղաք, քարուքանդ փողոցներ, ընչազուրկ բնակչություն, արտագաղթ, նշանակում է` Գյումրին այս տարիներին ոչ թե ղեկավարել են, այլ մաս-մաս խժռել: