Դաշնակցությունն ու ՀԱԿ-ը կմիանա՞ն նաիրիտցիների ցույցին

Հունիսի 23-ին` ժամը 11.00-ին, նաիրիտցիները պատրաստվում են կրկին բողոքի ցույցի հավաքվել ՀՀ կառավարության շենքի մոտ, որտեղից էլ երթով կգնան Բաղրամյան 26։

Այս անգամ նաիրիտցիները բողոք-ակցիային հրավիրելու են մասնակցելու այն ընդդիմադիր կուսակցություններին, որոնց քաղաքական օրակարգում ինչ-որ ժամանակ եղել է «Նաիրիտի» հարցը:

Այդ ուժերն են «Բարգավաճ Հայաստանը», «Հայ ազգային կոնգրեսը», «Հայ Յեղափոխական Դաշնակցությունը», «Հայկական վերածնունդը», «Ժառանգությունը», «Ալյանսը», ՀԿԿ-ն, ՀՌԱԿ-ը և այսպես շարունակ:

Հիշեցնենք, որ դեռևս այս տարվա մարտին «Ռոստեխ» կորպորացիայի «ՌՏ-Խիմկոմպոզիտ» հոլդինգն առաջարկություններ կներկայացնի «Նաիրիտի» վերագործարկման վերաբերյալ, որի մասին հայտնել էր էներգետիկայի և բնական պաշարների նախարար Լևոն Յոլյանը:

Ավելի վաղ էներգետիկայի և բնական պաշարների նախարարը հայտարարել էր, որ Հայաստանը ներդրող է փնտրում «Նաիրիտի» համար, որի գործարկումն, ըստ նախնական գնահատականի, պահանջում է $200-300 մլն ներդրում: Ներդրողների փնտրտուքները, սակայն, բերել են նրան, որ Յոլյանն այժմ որոշել է ներդրողների փնտրտուքով զբաղվեն հենց նաիրիտցիները. կառավարությունը ձեռքերը լվաց «Նաիրիտից»:

Newspress.am-ի հետ զրույցում «Նաիրիտի» նախկին տնօրեն Կարեն Իսրայելյանը հատկապես ակցիային քաղաքական կուսակցությունների մասնակցության մասով նշեց, որ «Նաիրիտի» հարցը շատ ակտուալ թեմա է, և կուսակցություններն անպայման կմասնակցեն ակցիային:

Նա հիշեցրեց, որ «Նաիրիտի» աշխատակիցներին այս ընթացքում աջակցություն են հայտնել հատկապես Դաշնակցությունն ու ՀԱԿ-ը և հույս հայտնեց, որ վերջերս ստեղծված «Համախմբում» կուսակցությունը ևս կմիանա ակցիային:

Կարեն Իսրայելյանը ներկայացրեց նաիրիտցիների պահանջները` նախ «Նաիրիտի» վերագործարկում, նաև հրաժարում այն պայմանագրից, որ նաիրտցիներն ստորագրել են «Նաիրիտ-2»-ի հետ, որպեսզի աշխատավարձեր ստանալու դիմաց հրաժարվեն այն տոկոսներից, որ կուտակվել են աշխատավարձ չվճարվելու ժամանակահատվածում:

Այժմ նաիրիտցիներն իմացել են, որ «Նաիրիտ-2»-ն այդ պարտքերի դիմաց ցանկանում է «Նաիրիտիղ» գույք ձեռք բերել, որի հետ գործարանի նախկին աշխատակիցները համամիտ չեն, նրանք տոկոսներից հրաժարվել են միայն «Նաիրիտի» վերագործարկման ակնկալիքով: