Նախագահների հանդիպումը քննություն է Ադրբեջանի համար. Շավարշ Քոչարյան (տեսանյութ)

Արտաքին գործերի նախարարի տեղակալ Շավարշ Քոչարյանն այսօր Ազգային ժողովում լրագրողների հետ զրույցոմ անդրադարձավ հունիսի քսանին նախատեսված` ՀՀ նախագահ Սերժ Սարգսյանի և Ադրբեջանի նախագահ Իլհամ Ալիևի հանդիպմանը:

Հարցին, թե տեսնո՞ւմ է արդյոք հանդիպման անհրաժեշտություն՝ առանց Վիեննայում ձեռքբերված պայմանավորվածությունների կատարման և այդ առումով առաջընթաց նկատելի համարո՞ւմ է, Շավարշ Քոչարյանն ասաց.

«Առանց դրա` խոսել որևէ առաջընթացի, արդյունավետ բանակցությունների մասին, անհնարին է: Այդ տեսակետից այս հանդիպումը քննություն է Ադրբեջանի համար, արդյոք նա Վիեննայում չկարողանալով դիմակայել այդ երեք պետությունների ներկայացուցիչների ճնշմանը կամ առաջարկություններին` համաձայնվեց, իսկ հիմա փորձելո՞ւ է տապալել, թե՞ ոչ»:

Ըստ Քոչարյանի անձնական տեսակետի՝ Ադրբեջանն ամենևին հակված չէ այդ մեխանիզմների լիարժեք ներդրմանը և հենց ամսի քսանը ցույց կտա, կփորձի՞ ինքը այդ կարևորագույն խնդիրը պայմանավորել հազար ու մի այլ հարցերով, որպեսզի տապալի Վիեննայում ձեռքբերված պայմանավորվածությունները:

Ինչ վերաբերում է հարցին, թե ինչո՞ւ ԵԱՀԿ-ն սկզբում հայտարարարեց, որ չի մասնակցում հանդիպմանը, իսկ հիմա Ուորլիքը համաձայնություն հայտնեց, Շավարշ Քոչարյանը պատասխանեց, որ բազմաթիվ են եղել հանդիպումները, որտեղ ԵԱՀԿ-ն չի ներգրավվել, թեև որոշակի տրամաբանություն կա, որ պետք է ներկայացուցիչը լինի` կապված այն հանգամանքի հետ, որ գործող նախագահը Գերմանիան է և նրա ակտիվ ջանքերով ԵԱՀԿ-ն ներկայացրել է կոնկրետ փաստաթղթեր` քննարկման համար:

Առավել մանրամասն՝ տեսանյութում: