Վարդան Օսկանյանը քաղաքական կամք է փնտրում (տեսանյութ)

Անցկացվեց «Համախմբում» կուսակցության հիմնադիր համագումարը: Կուսակցության ղեկավար ընտրվեց ՀՀ ԱԺ պատգամավոր Վարդան Օսկանյանը: Որպես կուսակցության նախագահ` նա իր ելույթի ժամանակ ասաց, որ իրենց գլխավոր նպատակը երկրում արդարությունը վերականգնելն է և ժողովրդավար երկիր ստեղծելը:

«Ժողովուրդը շատ բան չի ուզում, ընդամենն ուզում է իր հասանելիքը: Արդարությունն այն է, որ խեղճի և հզորի միջև ծագած վիճաբանության ժամանակ դատավորն առանց կաշառքի վճիռ կայացնի: Մենք հավերժ կարող ենք ձևացնել, որ ունենք ժողովրդավար պետություն, բայց իրականությունն այլ է: Ահավասիկ այս ամենը փոխելու համար է ստեղծվում «Համախմբում» կուսակցությունը»,- ասաց Օսկանյանը:

«Համախմբում» կուսակցության վարչության կազմը բաղկացած է 16 հոգուց: Կուսակցության փոխնախագահներն ընտրվեցին Էլինար Վարդանյանն ու Ստեփան Մարգարյանը: Կուսակցության անդամ Անդրանիկ Թևանյանն իր ելույթում ասաց, որ մենք կանգնած ենք ճակատագրական ընտրության առաջ` կա′մ թողնել ինչպես որ կա, կա′մ էլ փոխել քաղաքական ամբողջ էլիտան:

«Մենք կանգնած ենք ճակատագրական ընտրության առաջ: Կա′մ պետք է թողնենք ամեն ինչ ինչպես որ կա, և կրավորական կեցվածք ընդունենք, կա′մ էլ շարժվենք առաջ: Երբ փայ մտնելն ու փայ խլելը սկզբունք է, ունենում ենք մարդկային և տարածքային ցավալի կորուստներ: Վառ օրինակն ապրիլյան մարտերն են: Այս ամենի համար մեզ պետք է համախմբում»:

Մարդու իրավունքների նախկին պաշտպան Կարեն Անդրեասյանն էլ հայտարարեց, որ միանում է «Համախմբում» կուսակցությանը: Լրագրողների հարցին, թե արդյոք նա պատրաստ է միանալ մի կուսակցության, որի ետևում կանգնած է ՀՀ 2-րդ նախագահ Ռոբերտ Քոչարյանը, և ում կառավարման օրոք բազմաթիվ խախտումներ են նկատվել, Կարեն Անդրեասյանը ասաց , որ Հայաստանի բոլոր նախագահների օրոք էլ այդ խախտումները նկատելի է եղել:

Հարցին, թե արդյոք Ռոբերտ Քոչարյանի հետ կարո՞ղ է ճանապարհ գնալ, Կարեն Անդրեասյանը պատասխանեց, որ ինքը ցանկացած մարդու հետ կարող է ճանապարհ գնալ, եթե իհարկե ծառայում են մարդու իրավունքների արդարությանն ու ժողովրդավարությանը:

«Ճանապարհ չեմ գնա միայն բանսարկուների և այն մարդկանց հետ, որոնց խոսքն ու գործն իրար հետ չեն համընկնում: Որորշել եմ միանալ այս կուսակցությանը, քանի որ այն գաղափարապես ինձ հարազատ է թվում»,- եզրափակեց Կարեն Անդրեասյանը: