Շարմազանովը նույնիսկ չզգուշացրեց Արտաշես Գեղամյանին

Այսօր ԱԺ արտահերթ նիստում, ուր քննարկվում էր «Սպառողների պաշտպանության մասին» օրենքում փոփոխություններ անելու մասին հարցը, ելույթ ունեցավ ԱԺ ՀՀԿ խմբակցության պատգամավոր Արտաշես Գեղամյանը: Ըստ նրա` սպառող ասելով` պետք է նկատի ունենալ նաև տեղեկատվական սպառումը, և որ այսօր ոչ ոք ապահովագրված չէ տեղեկատվական դիվերսիաներից:

Արտաշես Գեղամյանին վրդովեցրել էր որոշ լրատվամիջոցների` իրեն ուղղված քննադատություները:

Նա հիշեցրեց, որ գիրք է հրատարակել Լեռնային Ղարաբաղի խնդրի մասին և բաժանել ԵԱՀԿ ԽՎ ղեկավարությանը, համանախագահ երկրների ներկայացուցիչներին: Պատգամավորի խոսքով` երբ երկրորդ գիրքը հրատարակեց ԼՂ խնդրի վերաբերյալ, որը թարգմանվեց յոթ լեզվով, թուրք-ադրբեջանական կայքերն սկսեցին հայհոյել իրեն, որովհետև, ըստ նրա, իր գրքերը սարսափելի խոցելի էին դարձնում Ադրբեջանին ու Թուրքիային:

«Եթե հայեր են կանգնած այդ ադրբեջանական կայքերի ետևում, ապա նրանք ոչ այլ ոք են, քան Սովետաշենի զիբիլանոցում գինովցած բոմժերի սեռական հարաբերությունների վաղաժամկետ ծնունդ: Դիմում եմ Ռոբերտ Քոչարյանին, Սամվել Բաբայանին ու Վարդան Օսկանյանին` ձեզ գովերգող կայքերի գյամերը քաշեք: Եթե ձեզ թվում ա` ես այս կամ այն դուրս ընգած լրագրողին պետք է քննադատեմ, ապա սխալվում եք, եթե սկսեմ քննադատել, ստիպված կլինեք ժամանակավորապես ձեր պրապիսկան փոխել»,- զայրացած ասաց Գեղամյանը:

Այնուհետև Գեղամյանը պուտինյան գովքը և ռուսերենով կարդաց Պուտինի ողջույնի խոսքը՝ ուղղված ՀՀԿ-ին:

Ի դեպ, նշենք, որ չնայած Գեղամյանը վիրավորանքներն ու ցենզուրայից դուրս բառերը ոչ մի առնչություն չունեին քննարկվող նախագծի հետ, սակայն նիստը վարող Էդուարդ Շարմազանովը չփորձեց ընդհատել կամ գոնե զգուշացնել Արտաշես Գեղամյանին և քաղաքական ամբիոնը Արտաշես Գեղամյանի տրամադրության տակ մնաց մինչև վերջ, այլ խոսքով` Շարմազանովը թույլ տվեց, որ Արտաշես Գեղամյանը, ինչպես կասեր դասականը, «քիթը խոթի» լրատվամիջոցների մեջ: