Գալուստ Սահակյանը գիտի, բայց չի ասում, թե ովքեր են ընտրակաշառք բաժանողները

ՀՀ ԱԺ նախագահ Գալուստ Սահակյանը խորհրդարանում լրագրողների հետ զրույցում անդրադառնալով ԱԺ Պետաիրավական հարցերի մշտական հանձնաժողովում Ընտրական օրենսգքի շուրջ ձևավորված «4+4+4» ձևաչափի շրջանակներում իշխանության և ընդդիմության ներկայացուցիչների միջև երեկ ստորագրված Ընտրական օրենսգրքում ընտրական գործընթացի օրինականության վերահսկման կազմակերպման տեխնիկական մեխանիզմների սահմանման շուրջ փոխհամաձայնության մասին հայտարարությանը` ասաց, որ ընդունված փաստաթուղթը հնարավորություն կտա բացառել այն ընտրախախտումները, որոնց մասին մշտապես բարձրաձայնվում է:

Հարցին, թե ինչո՞ւ էր անհրաժեշտ նման փաստաթուղթը և արդյոք ԵՄ-ից գումարներ ստանալու համար իշխանությունը համոզե՞ց ընդդիմությանը, Գալուստ Սահակյանը չհամաձայնեց. «Իշխանությունը որևէ գումար չի ստանալու, այն կազմակերպությունը, որը գումար պիտի տրամադրի, ինքը սարքավորում կբերի»:

Հարցին, թե այդ սարքավորումները հնարավորություն կտա՞ն բացառել այն ընտրախախտումները, որոնց մասին մշատապես բարձրաձայնվել է, Գալուստ Սահակյանը պատասխանեց, որ այժմ ընդունվածն էլ ընտրախախտումների վերաբերյալ, այլևս նույն վիճակում չի լինի, սակայն առաջարկություններ կան մատնահետքեր վերցնելու և այլն, ինչին իշխանությունը համաձայն է. «Մենք հետևյալն ենք ասում, մեզ համար լրիվ միևնույն է. պարզապես անհրաժեշտ են հատուկ սարքավորումներ»:

Դիտարկմանը, թե հանրության վստահության համա՞ր է իշխանությունը գնացել այդ քայլին, ԱԺ նախագահն ասաց. «Մեկ անգամ պիտի ամեն ինչ անել, որ և′ հասարակությունը, և′ ընդդիմությունը, և′ քաղաքական ուժերը հասկանան, թե ովքեր են ընտրվում և ինչի համար»:

Հարցին, թե մինչ այժմ չե՞ն իմացել, Գալուստ Սահակյանը պատասխանեց. «Մինչև հիմա մտածել են, որ ընտրությունները պարզ տեսակ են, և եթե որևէ թիմ հաղթում էլ էր, ասում էին՝ վսյո, անվավեր է, որովհետև ինչ-որ բան էն չի»:

Հարցին, թե ստորագրված համաձայնագրով ի՞նչը կբացառվի՝ ընտրակաշառք չե՞ն բաժանի, վարչական լծակներ չե՞ն կիրառվի, Գալուստ Սահակյանն ասաց. «Այս խնդիրը վերաբերում է ընտրության օրվան, իսկ դրանից առաջ ով ընտրակաշառք է տալիս, ով ինչ գործողություն է սպասարկում… դա ամբողջ աշխարհում էլ կա: Այսինքն` ես չեմ կարծում, որ ինչ-որ մեկը սպասում է, որ իրեն ընտրակաշառք տան, որ գնա ընտրության»:

Դիտարկմանը, թե այսինքն էլի իշխանությունը կաշա՞ռք է տալու, Գալուստ Սահակյանն ասաց, որ իր կարծիքով՝ իրենք երբեք ընտրակաշառք չեն բաժանել, սակայն մեկ առ մեկ գիտեն, թե ովքեր են ընտրակաշառ բաժանում. «Մեր հաշվին ոչ ոք քվեներ չի ապահովում, մենք անցնում ենք մեր ձայների հույսով: Իհարկե, երբեմն մեր միջից էլ մարդիկ կարող են լինել, ովքեր կփորձեն ինչ -որ մի բան անել, բայց, ընդհանուր առմամբ, ես չեմ կարծում, որ ընտրակաշառքով որևէ թիմ անցնում է: Այդ պատճառով մենք կողմնակից ենք որևէ նորագույն տեխնոլոգիայով ընտրությունների անցկացմանը, այդտեղ կերևա ոչ թե ընտրակաշառքը, այլ այն, որ մարդը մտել, քվեարկել է: Ենթադրենք, թե որևէ մեկին կաշառք տվեցին, ո՞վ ասաց, որ դու տվել ես, քեզ էլ պետք է քվեարկի»:

Հարցին, թե կհայտնի՞ ընտրակաշառք բաժանողների անուններ, Գալուստ Սահակյանն ասաց. «Ես այնքան շատ բաներ գիտեմ, բայց որևէ բան չեմ ասում, որովհետև եթե ես որևէ բան ասեմ, պիտի ընկնեմ ապացուցեմ, իսկ ապացուցելը դժվար է»:

Դիտարկմանը, թե նախադեպ կլիներ, եթե մեկ անգամ հայտարարվեր, Գալուստ Սահակյանն ասաց, որ ինքը նախադեպերի հետևից չի ընկնում: