Դեմ քվեներ, բղավոցներ ու մեղադրանքներ. ԱԺ-ն ընդունեց վարկային համաձայնագիրը

ԱԺ-ում քվեարկության դրվեց ընդդիոմւթյան կողմից քննադատության արժանացած` Հայաստանի Հանրապետության և Վերակառուցման և զարգացման միջազգային բանկի միջև 2016 թվականի մայիսի 12-ին ստորագրված «Էներգետիկայի ոլորտի ֆինանսական առողջացման ծրագիր» վարկային համաձայնագիրը, որով նախատեսվում է վերցնել 30 միլիոն դոլար վարկ:

Վարման կարգով խոսեց ԱԺ ՀԱԿ խմբակցության պատգամավոր Նիկոլ Փաշինյանը, ով էլ նշեց, որ իր պատգամավոր լինելուց ի վեր բոլոր վարկային համաձայնագրերին առանց բացառության դեմ է եղել: Պատգամավորի խոսքով՝ եթե որևէ մեկը կառավարությանը կոռումպացված համարելով կողմ է քվեարկում` ուրեմն՝ վստահության քվե է տալիս այս վարկային համաձայնագրերին և հանդես է գալիս այն միջոցները փոշիացնելու` հանցակցի դերում:

ԲՀԿ խմբակցության պատգավոր Միքայել Մելքումյանն էլ ասաց, որ արտադրող կայանների հանցագործ կառավարման մեղքը պետությունը չպետք է իր ձեռք վերցնի, որովհետև սրանք ձեռնարկությունն են: Պատգամավորն ասաց, որ ԲՀԿ-ն դեմ է քվեարկելու:

Իր հերթին ԲՀԿ խմբակցության ղեկավար Նաիրա Զոհրաբյանն էլ ասաց, որ պետք է այնպես անել, որ Ատոմակայինի տնօրենը վերադարձնի 20 միլիոն դոլար գողացված գումարը:

Սակայն ԱԺ անկախ պատգամավոր Խաչատուր Քոքոբելյանը կողմ է քվեարկելու, քանի որ վտանգ կա ինֆրաստրուկտուրաների վերացման: Ըստ նրա` եթե շարժվեն Փաշինյանի տրամաբանությամբ, ապա կառավարության հետ, անգամ հարցուպատասխանի չպետք է մասնակցեն:
Ստեփան Մարգարյանն էլ նկատեց, որ էներգետիկայի բնագավառում տարբեր պատճառաբանություններով վարկ ենք վերցնում. «Սակագներն են փոխվում, պարտք ենք վերցնում, վերազինման մասին պարտք են վերցնում, սակայն հեչ պարզ չի, թե ուր է հասնելու: Ի՞նչ է նշանակում` «Նաիրիտին» պարտք ենք տվել, ո՞վ է որոշել, որ այդ բեռը մենք մեզ վրա պետք է վերցնենք»,- ասաց պատգամավորը և հայտնեց, որ երեկ քննարկմանն ուշադիր հետևել է իր աշխատասենյակից:

Մարգարյանի վերջին խոսքը բարկացրեց ԱԺ փոխնախագահ Հերմինե Նաղդալյանին և նա բարկացած ասաց. «Ինչո՞ւ եք նիստի ժամանակ ռադիոյով լսում, հետո գալիս բովանդակային քննարկման մեջ մտնում: Գայիք, դահլիճում քննարկեիք»,- բղավեց ԱԺ փոխնախագահը:

ԱԺ ՀԱԿ խմբակացության պատգամավոր Հրանտ Բագրատյանն էլ կառավարության տրամաբանությունը «երկաթյա տրամաբանության» որակեց:

Նախագիծը դրվեց քվեարկության և անցավ 70 կողմ, 32 դեմ ձայների հարաբերակացությամբ: