ԱԺ-ն ընդունեց մի շարք օրենսդրական նախագծեր

Խորհրդարանն աշխատանքային օրվա մեկնարկին ընդունեց մի շարք օրենսդրական նախագծեր։ Քվեարկության դրվեց նաև Հայաստանի և Վերակառուցման և զարգացման եվրոպական բանկի միջև 2016 թվականի մայիսի 11-ին ստորագրված «Գյումրու քաղաքային ճանապարհներ» վարկային համաձայնագիրը, որով նախատեսվում է 14 600 մլն եվրո գումարի չափով վարկ տրամադրել:

Մինչ քվեարկությունը վարման կարգով խոսեց ԱԺ ԲՀԿ խմբակցության ղեկավար Նաիրա Զոհրաբյանը: Նա նշեց, որ թեև ԲՀԿ վարկային համաձայնագրերի հետ կապված հստակ բացասական վերաբերմուքն ունի, բայց «Սա բացառիկ դեպք է, և մենք կողմ ենք քվեարկելու»,- ասաց նա:

Խոսեց նաև ՀԱԿ խմբակացության պատգամավոր Նիկոլ Փաշինյանը, ում խոսքը ոչ թե համաձայնագրի, այլ գործարար պատգամավոր Սամվել Ալեքսանյանի մասին էր:

Մեջբերելով մամուլի հրապարակումները` Փաշինյանն ասաց. «Խոսվում էր պատգամավոր Սամվել Ալեքսանյանի կողմից կատարված ահաբեկումների մասին, և ես պահանջում եմ, որ ՀՔԾ-ն լուրջ քննության ուշադրություն դարձնի: Պետք է ուշադրություն դարձնել նաև Մալաթիա Սեբաստիա համայնքի ոստիկանությանը, և պետք է հասկանալ, թե դա ՀՀ ոստիկանության բաժանմո՞ւնք է, թե՞ Սամվել Ալեքսանանի անձնական օգտագործման բաժին»:

ՕԵԿ խմբակացության անունից էլ խոսեց պատգամավոր Հովհաննես Մանուկյանը և ասաց, որ ՕԵԿ-ը կողմ է: Նախագիծը դրվեց քվեարկության և անցավ 102 կողմ, 4 դեմ և 2 ձեռնպահ ձայների հարաբերակցությամբ:

ԱԺ-ում քվեարկության դրվեց «Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություններ կատարելու մասին օրենքի նախագիծը: Այն 2-րդ ընթերցմամբ և ամբողջությամբ ընդունվեց՝ 76 կողմ, 23 դեմ և 6 ձենռպահ ձայների հարաբերակցությամբ։