Ամեն մեկն Արարատի բոյի սար է վերցրել, վրեն Արարատի բոյի տուն սարքել. Նիկոլ Փաշինյան

Խորհրդարանում քննարկվում է Հայաստանի Հանրապետության և Վերակառուցման և զարգացման միջազգային բանկի միջև 2016 թվականի մայիսի 12-ին ստորագրված «Էներգետիկայի ոլորտի ֆինանսական առողջացման ծրագիր» վարկային համաձայնագիրը, որի շրջանակներում ելույթով հանդես եկավ ՀԱԿ խմբակցության պատգամավոր Նիկոլ Փաշինյանը: Պատգամավորն անդրադարձավ հիմնական զեկուցողի հիմնավորումներին՝ բյուջեի ճեղքվածքի վերաբերյալ և ասաց. «Հիմնական զեկուցողն առանց ավելորդ կոմպլեքսների հարցերին պատասխանում է, ասում է՝ դե մենք խնդրել ենք, որ ատոմակայանն ու ՋԷԿ-ը ֆինանսավորի, ասում է` դե մի քիչ «Նաիրիտ»-ին ենք տվել, մի քիչ «Քիմպրոմ»-ին, իբր մարդիկ աշխատավարձ են ստացել, բայց էդ դանայան տակառում աշխատողներն ու չաշխատողներն ինչ են ստացել, առանձին քննության խնդիր է, դա դեռ հարց է` էդ մի տեղն է գնացել, թե տասնյակ տեղեր, դե օրինակ վարչապետը եկեղեցի է կառուցում, Սերժ Սարգսյանը, չգիտեմ, մատուռ է կառուցում, ու սենց զանգում են՝ դե մի 50 միլիոն, մի 100 միլիոն, վերջում՝ վա՜յ, ճեղքվածք է առաջացել»,- ասաց Փաշինյանը:

Փաշինյանը հիշեցրեց, որ էներգետիկ համակարգի 23 միլիարդ դրամ ֆինանսական ճեղքվածն էր պատճառը, որ հոսանքի սակագինը բարձրացավ 3 տարի անընդմեջ, իսկ ճեղքվածքը ոչ միայն չի փակվել, այլև մեծացել է.

«Եթե շատ խորանանք, կասեն, բանակի հետ կապված հարցերը լուծում ենք, ու այդպես 5-10 տարի մեզ այդ լեգենդներով խաբում են»,- ասաց նա՝ հիշեցնելով ՀՀ հակաօդային զորքերի պետ Արմեն Վարդանյանը հունիսի 10-ին «Հ1»-ի եթերում ասված խոսքերը. «Դե գիտեք, մենք առայժմ կործանիչ ավիացիա չունենք».

«Ինչպես ասում են՝ կանգնեցրեք խնդրեմ գերժամանակակից գերձայնային ֆայտոնը, այստեղ իջնող կա. բա կործանիչ ավիացիա չունենք, քաղաքացիական ավիացիա չունենք, տրանսպորտային ավիացիա չունենք, բա 26 տարվա պետությունն ինչո՞վ է զբաղված եղել, բա ի՞նչ ունենք. ունենք պարտքեր, ուրիշ ոչ մի բան»,-ասաց Փաշինյանը և հավելեց, թե 15 տարի աչքով-ունքով ասում են, թե բանակի ծախսերն են հոգում, թե որ օլիգարխներին պատերազմի մասնակցի մեդալ են տալիս, դա ուրիշ բանի հետ է կապված:

Պատգամավորը նշեց, որ սպաները ծայրահեղ խնդիրների մեջ են` չնայած տարիներով ծառայել են հայրենիքին:

«Բա որ էդքան ասում ենք` ԿԲ-ի անհեթեթ շենքը, Հարկայինի հանգստյան տուն է, ինչ է, տասնյակ դոլարներ եք ծախսել ռոկոկո ունիտազներով՝ Գագիկ Խաչատրյանի համար նախատեսված»,- ասաց Փաշինյանը` նշելով, որ այդ գումարներով հնարավոր էր ԶՈՒ հարյուրավոր սպաների բնակարաններով ապահովել:

Ինչ վերաբերում է բաց երկնքի քաղաքականությանը, Փաշինյանն ասաց, որ ոչ մի բան չունի երկիրը և լրիվ կատարյալ բաց է…

Անդրադառնալով օլիգարխներին, պատգամավորն ասաց, որ հարուստ մարդը պետք է ներքին կուլտուրա ունենա. «Ինքը պետք է իմանա, որ եթե իր երկրում բանակի գնդապետները, փոխգնդապետները, մայորները, որ 20 տարի խրամատից տուն, տնից խրամատ են արել, էդ մարդիկ տուն չունեն, պետք է էդ պալատները չկառուցեն, ամեն մեկն Արարատի բոյի սար է վերցրել, վրեն Արարատի բոյի տուն սարքել»,- ընդգծեց պատգամավորը և հարցրեց, թե հարկ եղած դեպքում էդ տների մատույցներում ովքե՞ր են կանգնելու. «Խիստ կասկածում եմ, որ ավտոմատավոր ախռանիկները լինեն»:

«Հիմա էդքան որ ասում են Ռոբերտ Քոչարյանը 4 միլիարդ դոլարի կապիտալ է կուտակել, մենք պետք է հանարավորություն ունենանք ճշտելու՝ դա իրոք տե՞նց է, թե՞ ոչ, դրա համար բոլոր օֆշորները, միջազգային կազմակերպությունները ինֆորմացիան մեզ տրամադրեն»,-եզրափակեց Նիկոլ Փաշինյանը: