Կառավարությունը «դանդաղ շտապելով» պայքարում է կոռուպցիայի դեմ

Վարչապետ Հովիկ Աբրահամյանի գլխավորությամբ կառավարությունում նախօրեին տեղի է ունեցել Կոռուպցիայի դեմ պայքարի խորհրդի հերթական նիստը, որին մասնակցել են քաղաքական ուժերի, քաղաքացիական հասարակության և միջազգային կազմակերպությունների ներկայացուցիչներ:

Պարզվում է, որ կոռուպցիայի դեմ պայքարի համար կառավարությունը այլ բան չի մտածել, քան «կոռուպցիայի դեմ պայքարի ինստիտուցիոնալ համակարգի և աշխարհի տարբեր երկրների համանման փորձի ուսումնասիրության արդյունքները»: Հավելենք, որ դա հաստատ ավելի երկար կձգվի, քան բուն կոռուպցիայի բացահայտումները և Հայաստանում:

Բացի այդ, ձևավորվելու են կոռուպցիայի դեմ պայքարի մարմիններ, նաև ուսումնասիրվելու են միջազգային մի շարք փաստաթղթերով սահմանված հիմնարար սկզբունքները, որոնք ուղղված են հակակոռուպցիոն մարմինների անկախության ու արդյունավետության ապահովմանը:

Այս ամենն անելուց հետո, որոշվելու է Հայաստանում ստեղծել հակակոռուպցիոն ունիվերսալ անկախ մարմին, որը կներառի երեք բաղադրիչ՝ քննչական, կրթական և կանխարգելիչ, կամ հակակոռուպցիոն անկախ մարմին, որը կունենա կանխարգելիչ և կրթական գործառույթներ, ինչպես նաև առանձին քննչական մասնագիտացված մարմին:

Կարճ ասած` նման ձևակերպումներից հետո, կարելի է, թող լինի կոռուպցիա: Հաստատ Հայաստանում կոռուպցիայի դեմ հնարավոր չէ պայքարել` կաշառակերի համար երկար, անհասկանալի ձևակերպումներով, ոչ էլ որևէ խորհուրդ ստեղծելով, որտեղ չի բացառվում հենց կաշառակերներն են, որ իրենք բռնեն, իրենց չբռնեն:

Այսպես նաև ավելի լավ է, հնարավոր է անցանկալիներին կոռուպցիայով բռնել, քանի որ անմեղ մարդ չկա ի միջի այլոց, մեղադրել կոռուպցիայի մեջ, օրինակ 1 մլն դրամի համար, իսկ տասնյակ միլիոնավոր դոլարների կոռուպցիոն դեպքերը պարզապես «ջրել»:

Ի դեպ, վարչապետը հրահանգել է կոռուպցիայի դեմ պայքարի մոդելների հարցում չշտապել, այլ ուսումնասիրել և միջազգային փորձագետների ևս ներգրավել»:

Ինչպես սիրում է Հովիկ Աբրահամյանը կրկնել. «Դանդաղ շտապելով` առաջ գնանք»: