Կողմ եք քվեարկելու, ինչո՞ւ եք էդքան բորբոքված. Նաղդալյանը՝ Զոհրաբյանին

Կառավարության կողմից խորհրդարանին է ներկայացվել ՀՀ և Վերակառուցման և զարգացման եվրոպական բանկի միջև 2016թ. մայիսի 11-ին ստորագրված «Գյումրու քաղաքային ճանապարհներ» վարկային համաձայնագիրը, որի վարկային չափը հասնում է 14 600 մլն եվրոյի:

Այդ առնչությամբ ելույթով հանդես եկավ ԲՀԿ խմբակցության ղեկավար Նարիա Զոհրաբյանը:

«Բերված նախագիծը շատ կոնկրետ է՝ վարկային համաձայնագիր: Արտագաղթի ավտոբուսները և փողոցների վիճակը կատաստրոֆիկ է, առնվազն թեթև ատլետիկայի չեմպիոն պիտի լինել այդ փողոցներով անվնաս անցնելու համար: Այնպիսի աղետալի վիճակ, ինչպիսին Գյումրիի փողոցներում է, որևէ այլ քաղաքում գտնել հնարավոր չէ: Ամեն շաբաթ արտագաղթի ավտոբուսները տեսնելիս, հնարավոր չէ խոսել այդ ընտանիքների հետ, գլուխդ թեքում ես և արագ հեռանում, որովհետև ասելիք չունես»,- ասաց Զոհրաբյանը:

Անդրադառնալով վարկային համաձայնագրին` Նարիա Զոհրաբյանն ասաց, որ այդ համաձայնագրով բոլոր խնդիրները չեն լուծվելու, տնտեսական ենթակառուցվածքները չեն վերականգնվելու, որովհետև դրա համար պետք է ունենալ առողջ տնտեսություն: Օրինակ բերելով Ախուրյանի ճակընդեղի գործարանը` Զոհրաբյանն ասաց, որ այնտեղ ճակընդեղից շաքար արտադրվում է այնքան, որքան այնտեղ արտադրվում են գազի հաշվիչներ.«Հասկանալի է, չէ՞, որ այդ գործարանը կապ չունի շաքարի արտադրության հետ: Չգիտեմ` ինչ են սղցնում, ինչ են անում, ինչ են լվանում, ինչ հումք է բերվում, մաքսակետից անցվում, բայց եթե գործարանը ծառայեր իր նպատակին, գոնե մարզի որոշ մաս աշխատանք կունենար»:

Զոհրաբյանի խոսքով՝ իրենք վերապահումով են մոտենում ցանկացած վարկի, ոչ թե նրա համար, որ վարկ բառը սրբազան սարսուռ է արթնացնում,այլ այն պատճառով, որ մեծամասամբ վարկերն իրենց նպատակին չեն ծառայում, սակայն կան բացառություններ, այս համաձայնագիրն էլ բացառություններից մեկն է:

Զոհրաբյանը, հայտնելով խմբակցության տեսակետը` ասաց, որ կողմ է քվեարկելու համաձայնագրին, որովհետև, ըստ Զոհրաբյանի, սա կարևոր և ուշացած նախաձեռնություն է:

Սակայն Նաիրա Զոհրաբյանը նաև մտահոգություն հայտնեց այն առումով, որ վարկի 10 տոկոսը ծախսվելու է խորհրդատվության վրա. «Հասկանալի չէ, թե էդ ինչ նախաձեռնություն է, որ մոտ 2 մլն եվրո է ծախսվելու»:

Զոհրաբյանը նաև նշեց, որ փողոցների վերանորոգման հարցում պետք է հաշվի առնել նաև գյումրեցիների կարծիքը, վերանորոգել նաև մշակութային վայրերին հարող փողոցները:

Զոհրաբյանի ելույթին արձագանքեց ԱԺ փոխնախագահ Հերմինե Նաղդալյանը. «Կողմ քվեարկելու նոր բորբոքված ոճ է սա, կողմ եք քվեարկելու, ինչո՞ւ եք էդքան բորբոքված»,- ասաց նա: