«Վարդան, հետ արի, ամոթ ա». ԱԺ-ում կռիվ է ընկել

Խորհրդարանում քվեարկության դրվեց Կառավարության կողմից ներկայացրած «ՀՀ վարչատարածքային բաժանման մասին ՀՀ օրենքում փոփոխություններ կատարելու մասին և «Տեղական ինքնակառավարման մասին» ՀՀ օրենքում փոփոխությունների մասին օրենքների նախագծերի փաթեթը:

Վարման կարգով նախագծի մասին իր դժգոհությունը հայտնեց Հրանտ Բագրատյանը, ով ասաց, որ Հայաստանը Եվրոպա չէ, և եթե նույնիսկ գյուղում 10 մարդ կա, դպրոցը պետք է լինի, չի կարելի 2 կոպեկի համար բռնել համայնքը վերացնել:

Հրանտ Բագրատյանի հետ համամիտ չէր ԱԺ Տնտեսական հարցերի մշտական հանձնաժովոի նախագահ, ՀՀԿ-ական Վարդան Այվազյանը՝ նկատելով, որ ամեն ինչի մասին խոսում են բացի բուն օրենքից:

Պատգամավորի` տեղից արձագանքը հունից հանեց Բագրատյանին, և սկսվեց լեզվակռիվ նրանց միջև, մինչև Վարդան Այվազյանը լքեց նիստերի դահլիճը.

«Հանգիստ նստի տեղդ»,- ասաց Այվազյանը:

Բագրատյանն առանց բարձրախոսի շարունակում էր հակադարձել Այվազյանին, ինչի ի պատասխան` Այվազյանն ասաց.

«Հանգիստ նստի տեղդ, վունդերկինդ»,- հեգնեց Այվազյանը:

«Ընդմիջմանը կխոսեք, հիմա վախտը չէ»,- իրավիճակը փորձեց մեղմել ԱԺ նախագահ Գալուստ Սահակյանը:

«Զզվցրիք արդեն»,- ասաց Բագրատյանը:

«Էս «ազվերին» կերածներին հանգստացրեք, հա՞, թե չէ ես կհանգտսացնեմ»,- ասաց Այվազյանը՝ դիմելով ԱԺ նախագահին:

«Դե հելի, հանգստացրու»,- գոռաց Բագրատյանը:

«Արի հլը»,- ասաց Այվազյանը:

Վարդան Այվազյանը դուրս եկավ նիստերի դահլիճից, ԱԺ փոխնախագահ Էդուարդ Շարմազանովը փորձեց մեղմել իրավիճակը.
«Վարդան, հետ արի, ամոթ ա»:

Բագրատյանը փորձում էր դուրս գալ, բայց պատգամավորները նրան հետ պահեցին:

Այնուամենայնիվ, նախագիծը դրվեց քվեարկության և ընդունվեց 58 կողմ, 21 դեմ եւ 0 ձեռնպահ ձայներով: