Վարչապետը պատրաստվում է նոր կրճատումների

Վարչապետ Հովիկ Աբրահամյանի հանձնարարականով կառավարությունում բացվել է թեժ գիծ՝ 56.23.52 հեռախոսահամարով, որին կարող են դիմել սոցիալական նշանակություն ունեցող կարևորագույն ապրանքների ներմուծման, ապրանքային շուկայում դրանց մրցակցության խոչընդոտման, փոքր և միջին ձեռնարկատերերին շուկայից դուրս մղման և նորերի մուտքի սահմանափակման, սպառողների շահերի ոտնահարման, կոռուպցիոն, գների անհիմն տատանումների, ինչպես նաև դրանց հետ կապված անհրաժեշտ փաստաթղթերի, փորձաքննությունների, սերտիֆիկատների, վճարումների, ժամկետների, դրանց իրականացնող մարմինների և բողոքարկման կարգի հետ կապված բողոքների և առաջարկությունների առկայության դեպքում:

Իհարկե, թվում է, որ հրաշալի միջոց է բարձրաձայնելու, բողոքելու վերընշված խնդիրներին առնչվելու դեպքում:

Նշենք, որ նախ թեժ գիծ գործում է գերատեսչությունների մեծ մասում, և արդյոք լուծո՞ւմ է ոլորտի խնդիրները կամ բացերը, սա այլ հարց է, օրինակ գերատեսչությունների թեժ գծի աշխատակիցներ,ը փոխանակ բողոքների վերաբերյալ տեղյակ պահեն վերադասին, տեղյակ են պահում այն կառույցին, որի դեմ քաղաքացին բողոքում է: Սա` ի միջի այլոց:

Նշենք նաև, որ կառավարությունն այս տարվանից որոշել է հիմնավորապես պայքարել կոռուպցիայի դեմ և այլ միջոց չի գտել, քան թեժ գիծ բացելը, իսկ ինչ կլինի, եթե զանգահարեն թեժ գծին և դժգոհեն հենց վարչապետից, կգործի՞ այս դեպքում թեժ գիծը, թե՞ տեղյակ կպահեն վարչապետին, որ ձեզանից բողոքում են: Սա ևս` ի միջի այլոց:

Գների անհիմն տատանումների, սերտիֆիկատների, փորձաքննությունների և թեժ գծի համար նախատեսված այլևայլ գործառույթների համար արդեն կան համապատասխան կառույցներ, որոնք զբաղվում են այդ հարցերով:

Կամ այդ կառույցները՝ Մաքսային, ՍԱՊԾ, ՏՄՊՊՀ, Հակակոռուպցիոն խորհուրդ, որոնք կամ չեն աշխատում կամ այնքան վատ են աշխատում, որ վարչապետը ստիպված դիմում է ժողովրդին՝ լուծելու վերընշված խնդիրները:

Թեժ գիծ կոչվածը թափանցիկ աշխատաոճի քողարկում է, քանի որ խնդիրների դեպքում գերատեսչությունների ներկայացուցիչները մատնացույց են անում՝ թեժ գիծ ունենք, դիմեք:

Եվ եթե թեժ գծով հարցերը լուծվեին, ապա այն գերատեսչությունները՝ առողջապահություն, գյուղատնտեսություն, Սննդի անվտանգության պետական ծառայություն և այլ կառույցներում խնդիրները, կոռուպցիան կլիներ նվազագույն, որն այդպես չէ:

Միակ մարդը, ով հավատում է թեժ գծին, կարծես թե, վարչապետ Հովիկ Աբրահամյանն է, ու չի բացառվում, որ թեժ գիծ բացելով, վարչապետն օպտիմալացնի ՍԱՊԾ-ն, ՏՄՄՊՊՀ-ն, Հարկային ու մաքսային կոմիտեն դարձնի թեժ գծի օղակ և այդպիսով առաջին ձեռքից՝ իր իսկ ստեղծած թեժ գծից ստանալով կոռուպցիոն թեժացումներ: