Մենք պատերազմ չենք ուզում. Շարմազանով

Պատրաստ ենք պաշտպանել Արցախի ժողովրդի անվտանգությունը: Այս մասին, այսօր՝ հունիսի 15-ին, ՀՀ-ում Ղազախստանի նորանշանակ արտակարգ և լիազոր դեսպան Թիմուր Ուրազաևին և խորհրդատու Ժալգալ Ադիլբաևի հետ հանդիպման ժամանակ նշել է ՀՀ ԱԺ փոխնախագահ Էդուարդ Շարմազանովը: Այս մասին հայտնում են ԱԺ փոխնախագահի գրասենյակից:

Շարմազանովը, խոսելով տարբեր միջխորհրդարանական վեհաժողովներում Հայաստանի և Ղազախստանի աշխատանքի վերաբերյալ, կարևորել է առավել համաձայնեցված գործընկերային համագործակցությունն ու իրար չհակասող դիրքորոշումների առկայությունը քվեարկություններում:

Հանդիպմանն անդրադարձ է եղել ԼՂ հակամարտության կարգավորման, Հայոց ցեղասպանության ճանաչման և դատապարտման հարցերին, հայ-թուրքական հարաբերություններին:

Անդրադառնալով ԼՂ հակամարտության կարգավորման հարցին՝ ԱԺ փոխնախագահը մասնավորապես վերահաստատել է, որ Հայաստանը կողմ է խնդրի բացառապես խաղաղ կարգավորմանը: «Մենք պատերազմ չենք ուզում, մենք կողմ ենք խնդրի բացառապես խաղաղ կարգավորմանը, բայց պատրաստ ենք պաշտպանել Արցախի ժողովրդի անվտանգությունը»,- նշել է ԱԺ փոխնախագահը: Այս համատեքստում նա նշել է, որ Ադրբեջանից հնչող հայտարարությունները անլուրջ ու անհեթեթ են ու չեն բխում բանակցային տրամաբանությունից:

Հայ-թուրքական հարաբերությունների վերաբերյալ ԱԺ փոխնախագահը դեսպանին տեղեկացրել է, որ Թուրքիան արդեն 23 տարի շրջափակման մեջ է պահում Հայաստանը, ինչն անընդունելի է 21-րդ դարում, իսկ հարաբերությունների կարգավորման գործընթացում՝ խոսում նախապայմանների լեզվով, ինչը ևս անընդունելի է:

Էդուարդ Շարմազանովը նաև անդրադարձել է քաղաքակիրթ աշխարհի կողմից Հայոց ցեղասպանության ճանաչման և դատապարտման անհրաժեշտությանը՝ նշելով, որ ցեղասպանությունների ժխտումը հղի է նոր ցեղասպանությունների կրկնության վտան•ով:

Դեսպան Թիմուր Ուրազաևը, շնորհակալություն հայտնելով ընդունելության համար, կարևորել է գործընկեր երկրների հետ հավասարակշռված և կառուցողական հարաբերությունների հաստատումը, անհրաժեշտ համարել Հայաստանի հետ փոխգործակցության զարգացումն ու համագործակցության խորացումը միջխորհրդարանական մակարդակում և առևտրատնտեսական ոլորտներում: Դեսպանն առաջնային է համարել ընդհանուր հետաքրքրություն ներկայացնող հարցերի և խնդիրների քննարկումը: Դեսպանը նաև նշել է, որ Ղազախստանը հատկապես հետաքրքրված է ՀՀ օրենսդրությամբ և այդ ոլորտում փորձի փոխանակմամբ: