Համայնքների խոշորացմանը համայնքապետերը դեմ են, մարզպետն ու իշխանությունը` կողմ (տեսանյութ)

Համայնքների խոշորացման թեմայով տարբեր մարզերի համայնքների ղեկավարներ հրավիրվել էին կառավարություն՝ մասնակցելու ՀՀ ԱԺ տարածքային կառավարման և տեղական ինքնակառավարման հարցերի մշտական հանձնաժողովի արտագնա նիստին:

«ՀՀ վարչատարածքային բաժանման մասին» ՀՀ օրենքում փոփոխություններ կատարելու մասին օրենքի նախագծի քննարկմանը ներկա էր տարածքային կառավարման և զարգացման նախարարի տեղակալ Վաչե Տերտերյանը, հանձնաժողովի նախագահ Ստեփան Մարգարյանը:

Նիստը վարող Ստեփան Մարգարյանը համայնքապետերին առաջարկեց անկաշկանդ ներկայացնել իրենց հուզող հարցերը: Համայնքապետերի քննարկումներից ակնհայտ էր, որ հիմնականում համայնքների խոշորացմանը կողմ էին այն համայնքապետերը, որոնց ղեկավարած համայնքների շուրջ միավորվելու էին առավել փոքր համայնքներ:

Արարատի մարզի Շաղափ համայնքի ավագանի Մարո Առաքելյանը նշեց, որ իրենց համայնքը ևս պետք է խոշորացվի և միանա հարևան Ուրցաձորին: «Գյուղացիները կարծիքը կարող եք, չէ՞, հարցնել, իրենք համաձայն չեն: Ընտրության պահին են հարցնում համագյուղացիներին»,- ասաց համայնքի ավագանին, որին հակադարձեց Ուրցաձորի գյուղապետը, ով նշեց, որ կողմ է համայնքների խոշորացմանը և ինքը 17 տարի է՝ համայնքապետ է:

Ուրցաձորի համայնքապետին ի պատասխան՝ քննարկմանը ներկա համայնքապետերն ասացին, որ նա կարողանում էլավ լեկցիա կարդալ և առաջարկեցին խոշորացումով պատգամավոր ընտրեն, ոչ թե համայնքապետ:

Տերտերյանն էլ, արձագանքելով Մարո Աաքելյանի հարցին, թե յուրաքանչյուր փոքր հարցի համար համայնքի բնակիչները պետք է գնան հարևան գյուղ՝ ասաց, որ ամեն անգամ ինչ-որ տեղ գնալու խնդիր չկա և կլինի փոքրիկ վարչական ներկայացուցչություն համայնքում իր փոքրիկ աշխատակազմով:

Վստահեցնում եմ՝ նոր համայնքը շատ ավելի ունակ կլինի հարցին լուծում տալու համար»,- ասաց նա և նշեց, թե կարող են թեկնածություն առաջադրել և իրենց բնակավայրերի շահերը ներկայացնել:

Ելույթով հանդես եկավ նաև «Ժառանգություն» խմբակցության պատգամավոր Զարուհի Փոստանջյանը, ով ասաց, որ Հայաստանում կան խոշորացված համայնքներ, և պետք է ուսումնասիրել դրանց դրական և բացասական կողմերը և հետո անցնել մյուս համայնքների խոշորացմանը:

Այնուամենայնիվ, համայնքապետերի մեծամասնությունը դեմ էր համայնքների խոշորացմանը: Նույն Տավուշի մարզի Բարեկամավանի գյուղապետը հստակ հայտարարեց, որ իրենք դեմ են խոշորացմանը: Սակայն հանձնաժողովի ղեկավարն ու Վաչե Տերտերյանն իրենց դժգոհությունը հայտնեցին: Ելույթով հանդես եկավ նաև Տավուշի մարզպետ Հովիկ Աբովյանը, ով ասաց, որ մարզում համայնքի խոշորացում է եղել, որն էլ իր դրական արդյունքներն արդեն ցույց է տալիս:

Քննարկման ավարտին փոխհամաձայնություն ձեռք չբերվեց, միևնույն է, համայնքապետերն իրենց կարծիքին մնացին, Վաչե Տերտերյանն ու Ստեփան Մարգարյանն` իրենց: Քննարկմանը չհաջողվեց համայնքապետերին համոզել, որ կողմ լինեն խոշորացմանը: Առաջարկվող ծրագրին կտրականապես դեմ էին սահմանամերձ համայնքների ղեկավարները: