Հարկային օրենսգիրքը դիվերսիա է, սակայն ՀՀԿ-ն կուլ չի գնում

Այսօր Ազգային ժողովում Հարկային օրենսգրքի քննարկման ժամանակ անկախ պատգամավոր Էդմոն Մարուքյանն ասել էր, որ եթե կառավարությունն ու ԱԺ մեծամասնությունը Հարկային այս օրենսգիրքն ընդունեն, մարդիկ դուրս կգան փողոցներ ու ակցիաներ կանեն, այլևս ներվ չի մնացել:

Էդմոն Մարուքյանին պատասխանել էր ՀՀԿ խմբակցության ղեկավար Վահրամ Բաղդասարյանը. «Հետաքրքիր է` մի հատ առանձին իրեն կհրավիրեմ ու կտեսնեմ՝ ինչի՞ն չի հերիքում ներվերը» և ըստ նրա, որոշ գործիչների ելույթներում նախընտրական ենթատեքստ կա: Ըստ Վ. Բաղդասարյանի` մարդիկ, գնահատելով, որ իրենց հնարավորությունները բավական թույլ են ընտրությունների համար, պետք է ժողովրդին կոչ անեն դուրս գալ փողոց: Բայց դրանով արդյունքի չեն հասնի:

Նա նաև չհիշեց մի հարկային օրենք, որ այս տարիների ընթացքում դժգոհություն չի առաջացրել. «Բայց քննարկումների արդյունքում գալիս ենք ընդհանուր հայտարարի, և չի կարող մի բանը բոլորի համար լավը լինել»:

Վահրամ Բաղդասարյանը նաև շեշտեց, որ տարբեր ոլորտներ ունեն տարբեր շահեր, և եթե ՀՀԿ-ն այսօր կուլ գնա այդ տարբեր շահերին, նա չի կարող ունենալ այն օրենսգիրքը, որն անհրաժեշտ է պետության զարգացման համար. «Պետք է լսել բոլոր առաջարկությունները, հաշվի նստել դրանց հետ, ոչ թե առանձին ոլորտի տալ որևէ առավելություն: Հիշեցնենք, որ Հարկային օրենսգրքի քննարկման ժամանակ Միավորված աշխատանքային կուսակցության (ՄԱԿ) նախագահ Գուրգեն Արսենյանը ևս դեմ արտահայտվեց նախագծին` նշելով, որ տնտեսվարողների մասին խոսում են որպես որսի. «Էս Հարկային օրենսգրքով գնում եք նոր ընտրությունների՞, ի՞նչ եք ակնկալում: Սա դիվերսիա է ՀՀ քաղաքացու նկատմամբ, բերելու է նոր արտագաղթի: Հարգելիներս, դուք էն մարդիկ չեք, որ կարողանաք գերի վերցնեք ՀՀ տնտեսությունը»: