Լևոն Զուրաբյանի և Բարսեղ Բեգլարյանի տներից գողություն անողները բերման են ենթարկվել. գողոնն առգրավված է (ֆոտո)

Հունիսի 13-ին ոստիկանության քրեական հետախուզության գլխավոր վարչության, Երևան քաղաքի վարչության քրեական հետախուզության բաժնի, ՊՊԾ հատուկ գումարտակի և Արաբկիրի բաժնի ծառայողները, իրականացնելով համապատասխան միջոցառումներ, մայրաքաղաքի Սեբաստիա փողոցից, գողություններ կատարելու կասկածանքով, բերման են ենթարկել Արարատի մարզի բնակիչ, 1992 թվականին ծնված Շահեն Գասպարյանին և մայրաքաղաքի Շիրակի փողոցի բնակիչ, 1986 թվականին ծնված Նիկոլայ Հարությունյանին: Նրանք կասկածվում են Երևանում և հանրապետության մի շարք քաղաքներում շուրջ երեք տասնյակի հասնող գողություններ կատարելու մեջ:

Ձեռնարկված միջոցառումներով գողոնի մի մասը հայտնաբերվել և առգրավվել է:

Իրավապահները միջոցառումներ են իրականացնում գողությունների բոլոր հանգամանքները պարզելու և գողոնի մնացած մասը հայտնաբերելու ուղղությամբ:

Նշանակվել են անհրաժեշտ փորձաքննություններ:

Կատարվում է նախաքննություն:

Նշենք, որ խոսքն այն անձանց մասին է, ովքեր կասկածվում են գործարար Բարսեղ Բելգարյանի առանձնատնից գողություն անելու մեջ:

Այսօր «Հրապարակ» թերթն իր հերթին գրել էր, որ Բեգլարյանի առանձնատնից գողություն անողները գողություն են արել նաև ԱԺ ՀԱԿ խմբակցության ղեկավար Լևոն Զուրաբյանի բնակարանից: