Մանումենտի այդ բազմահազար մետրանոց տները գույքահարկ մուծո՞ւմ են. Արամ Մանուկյան

ՀԱԿ խմբակցության քարտուղար Արամ Մանուկյանը Հարկային օրենսգրքի քննարկման ժամանակ հայտարարեց, որ անընդունելի է նման կարևոր նախագիծը քննարկել այս տեմպով ու արագությամբ: Բացի այդ, պատգամավորն այն համոզմանն է, որ Հարկային օրենսդրությունը պետք է լինի ամենաքիչ փոփոխվող օրենսդրությունը, որ բիզնեսը ցնցումներ չապրի:

Արամ Մանուկյանը նաև նկատեց, որ Հարկային օրենսգրքի նախագիծը որևէ փորձագիտական ու մասնագիտական գնահատականի չի արժանացել: Ըստ պատգամավորի՝ պատահական չէ նաև այն, որ այսօրվա քննարկումների ժամանակ ՀՀԿ-ական բիզնեսմեն պատգամավորները հարցեր էին ուղղում հիմնական զեկուցողին:

Արամ Մանուկյանի խոսքով՝ անգամ իշխանության ներկայացուցիչ պատգամավորները չեն հասցրել իրենց հարցերը տալ և պարզաբանում ստանալ, իսկ նախագծի ընդունումն անընդունելի է, որովհետև չգիտեն, թե ինչ է ընդունվում:

Արամ Մանուկյանը ներկայացրեց իրենց մոտեցումը. «Հարկային դաշտը մեծացրու, հարկը քչացրու». «Հաղթանակի զբոսայգու դիմացի մայթը, Մանումենտի այդ բազմահազար մետրանոց տները գույքահայկ մուծո՞ւմ են, թե՞ չէ, չգիտեմ` ձեզ մոտ տեղեկանք կա՞, թե՞ չէ, բայց ես գիտեմ, որ կա′մ չեն մուծում, կա′մ մուծում են սիմվոլիկ: Կարծում եմ` այն հզոր, մեծ պալատները, որ աջ ու ձախ բարձրացնում են կա′մ չեն մուծում, կա′մ սիմվոլիկ, հլա դրանց բերեք հարկային դաշտ մտցնենք, տեսեք` ինչքան մուտքային աճ է լինելու: Մենակ թվի ավելացումով չի, համալիր պետք է լուծենք, ճնշումը մեծացնելով չի»: