Մասնավոր ապօրինի կայանատեղիները «խփո՞ւմ են» քաղաքապետարանի բիզնեսին

Երբ 2013թ. Հայաստանի վարորդների և ոչ միայն վարորդների կյանք ներխուժեցին կարմիր գծեր, այն ժամանակ հայտարարվեց, որ վճարումներ վարորդները պետք է կատարեն միայն այն վայրերի համար, որտեղ կան կարմիր գծանշումներ, իսկ մնացած վայրերում ապօրինի է:

Նշենք, որ մինչ այդ, նաև այժմ վճարումներ կատարում են տարբեր խանութների, սուպերմարկետների, շուկաների, մասնավոր օֆիսների սեփականատերերը: Նման պրոցեսը շարունակվում է նաև այսօր. օրինակ` «Փեթակ» առևտրի կենտրոնի տարածքում կամ «Մալաթիա»տոնավաճառի երկայնքով:

Այս իրավիճակը նաև խանգարում է քաղաքապետարանին, իսկ թե ինչու, այլ հարց է, քանի որ քաղաքապետարանին գուցե ձեռնտու չէ, որ տարբեր կառույցներ իր աչքից հեռու փող են աշխատում` առանց քաղաքապետարանի:

Հիշեցնենք, որ այսօր Երևանի քաղաքապետ Տարոն Մարգարյանն աշխատակազմի տրանսպորտի և առևտրի վարչություններին, 12 վարչական շրջանների ղեկավարներին հանձնարարել է խստացնել հսկողությունն ավտոկայանատեղի համար ապօրինի տուրքի գանձման դեպքերի նկատմամբ ու համագործակցել Երևան քաղաքի ոստիկանության և դատախազության հետ:

Տ. Մարգարյանը նաև նշել է, որ օրենքով հստակ սահմանված է ավտոկայանատեղի համար տուրքի գանձման կարգը, ըստ որի` նախատեսված չէ, որ ինչ-որ մեկը փողոցում կայանման գումար վերցնի քաղաքացուց:

«Օրենքը շրջանցողները և անօրինական գումար գանձողները պետք է ենթարկվեն խիստ պատասխանատվության», – ընդգծել է Տարոն Մարգարյանը:

Իսկ թե խիստ պատասխանատվությունն ինչպես է պետք արգելել, քաղաքապետը չի հստակեցրել, եթե օրինակ քաղաքացուն որևէ կենտրոնի մոտ գումար են պահանջում` ասելով, որ դա մասնավոր տարածք է և այդպիսին է իրենց գնային քաղաքականությունը, ապա քաղաքացին չի կարող ոչ Մարգարյանին դիմել, ոչ էլ դատախազություն, կամ որևէ փաստ ունենալ, քանի որ որևէ կտրոն չի տրվում:

Կարճ ասած` ավտոկայանատեղիների համար կարմիր գծեր ստեղծելը «խփեց» շատերի հեշտ փող վաստակելու գործին, այս մենաշնորհը մնաց քաղաքապետարանին, և քաղաքապետարանն էլ այժմ ցանկանում է հիշեցնել, թե ով է Երևանում տերն ու տնօրենը: Այս տարիներին այնպես չէ, որ անհայտ է մեքենա կայանելու համար գումար պահանջելու գործընթացը, սակայն միայն այժմ է քաղաքապետն զբաղվում այս գործով, երևի դրա համար իր պատճառներն ունի: