Հուսալի վաճառակետից գնեք թվային ընդունիչ սարքը. Ամալյան

Հայաստանը դեռևս վերջնական անցում չի կատարել անալոգային հեռարձակումից թվային հեռարձակման, սակայն արդեն թվային ընդունիչ սարքերից դժգոհություններ կան. շուտ են փչանում, և ոչ ոք պատասխանատու չէ այդ սարքերի վերանորոգման համար:

Newspress.am-ին «Հայաստանի հեռուստատեսային և ռադիոհաղորդիչ ցանց» ՓԲԸ-ի ղեկավար Գրիգոր Ամալյանն ասաց, որ իրենք անգամ պատասխանատու չեն անապահով խավի համար ներկրված սարքերի համար, սակայն փչանալու դեպքում, համաձայն երաշխիքային կտրոնի, կարող են տանել սարքերը, և եթե 5-օրյա ժամկետում չեն կարողանում վերանորոգել, ապա պետք է բոլորովին նոր սարք տան հաճախորդին. երաշխիքային կտրոնի վրա գրված է` ում դիմեն նման դեպքերում:

Ինչ վերաբերում է ապահով խավի կողմից ձեռք բերվող թվային ընդունիչ սարքերի խնդրին` ապա, ըստ Ամալյանի, իրենք պատասխանատու չեն դրանց հանդեպ, և շուկայում տարբեր կազմակերպություններ կան, որոնք կարող են ներկրել, ազատ շուկա է:

Գ. Ամալյանը հաղորդեց, որ ինքը թվային ընդունիչ սարքը գնել է փեթակից և խորհուրդ տվեց հուսալի վաճառակետից գնել սարքը, որ խնդիրների դեպքում կարողանան տանել վերանորոգման կամ փոխարինեն նորով:

Գրիգոր Ամալյանը հիշեցրեց, որ այս տարվա օգոստոսին անալոգային հեռարձակումն ամբողջովին կդադարեցվի: