ՀՕՊ համաձայնագրի վավերացումն ԱԺ արտահերթ նիստերի օրակարգում չէ

Ինչպես տեղեկացրել էինք, այսօր Ազգային ժողովի դիմաց մի խումբ քաղաքացիներ իրենց բողոքն էին արտահայտում 2016թ. հունիսի 3-ին Հայաստանի Ազգային ժողովի արտաքին հարաբերությունների մշտական հանձնաժողովի նիստում քննարկված և դրական եզրակացություն տրված 2015թ. դեկտեմբերի 23-ին Մոսկվայում ստորագրված «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի վերաբերյալ:

Ըստ նախնական տեղեկությունների՝ ՀՕՊ համաձայնագիրն արտահերթ նիստի օրերին վավերացվելու էր ԱԺ-ի կողմից, սակայն օրակարգի հայտնի դառնալուց հետո պարզվեց, որ ՀՕՊ համաձայնագրի վավերացումն ԱԺ արտահերթ նիստի օրակարգում չկա:

ՀՀԿ խմբակցության ղեկավար Վահրամ Բաղդասարյանն այս առնչությամբ լրագրողների հետ զրույցում ասաց, որ ինչպես ԱԺ արտահերթ նիստի օրակարգում, այնպես էլ քառօրյայում ՀՕՊ համաձայնագրի վավերացման նախագիծը չի եղել, և հետևաբար այն չէր կարող դուրս գալ. «Դա մեկ-երկու օրվա հարց չի եղել: Ժամկետները որոշում ենք մենք, եթե լինի դրա անհրաժեշտությունը` կասենք, մենք չենք շտապում»,- նշեց Վահրամ Բաղդասարյանը:

Պատգամավորը հայտնեց, որ դեռևս հստակ չէ, թե երբ է բերվելու համաձայնագիրը խորհրդարանի լիագումար նիստ:

Վահրամ Բաղդասարյանն իրականությանն անհամապատասխան որակեց այն տեղեկությունը, թե ՀՕՊ համաձայնագրի վավերացումն օրակարգից հանվել է հաշվի առնելով բողոքի ակցիաները: