«Չենք հանձնելու ո′չ օդը, ո′չ հողը». բողոքի ակցիա` ԱԺ-ի դիմաց (լուսանկարներ, տեսանյութ)

2016թ. հունիսի 3-ին Հայաստանի Ազգային ժողովի արտաքին հարաբերությունների մշտական հանձնաժողովի նիստում քննարկվեց և դրական եզրակացություն տրվեց 2015թ. դեկտեմբերի 23-ին Մոսկվայում ստորագրված «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրին: ՀՀ խորհրդարանն արտահերթ նիստի ընթացքում քվեարկության կդնի համաձայնագրի վավերացման հարցը, ինչի կապակցությամբ մի խումբ քաղաքացիներ իրենց բողոքն էին արտահայտում ՀՕՊ համաձայնագրի վերաբերյալ:

Ակցիային մասնակցող` ռեժիսոր Տիգրան Խզմալյանը համաձայնագրին միանալը քաղաքական սխալ է որակում, ինչի հետևանքով Հայաստանի ապագան «լուռ վաճառվելու է» Ռուսաստանին: «Ղազախստանի սահմանների վրա վերջերս կասկածելի հարձակումներ կան, և բոլորին հայտնի է, որ դրա հետևում Ռուսաստանն է, Բելառուսի սահմանի վրա սկսեցին վիճարկումներ, այսինքն՝ Հայաստանի իշխանություններն այս քայլով ոչ միայն դաշնակցում են, այլև հանցակից են դառնում մի չեկիստական քաղաքականության, որը մարտահրավեր է նետում աշխարհին: Նման քայլով մեր պետականությունը դարձնում են թիրախ` աշխարհի ռազմական, տնտեսական ամենահզոր ընտանիքին՝ ՆԱՏՕ-ին: Համաձայնագրի ստորագրումը սխալ է, դավաճանություն է, ռազմավարական մեծ սխալ: ՀՕՊ-ի համաձայնագրի ստորագրումով մենք պատերազմ ենք հայտարարում ոչ միայն Ադրբեջանին, այլև ամբողջ աշխարհին»,- նշեց Խզմալյանը:

Ակցիային Եվրամիության և ՀՀ դրոշներով միացավ նաև ԱԻՄ առաջնորդ Պարույր Հայրիկյանը: Ըստ նրա՝ 2013 թվականի սեպտեմբերից սկսած իշխանությունները մեկնարկեցին հակաքաղաքակրթական գործընթացը և ԵՏՄ անդամակցությանը ևս մեկ բացասական որակ է ավելացվում: « Եթե նման բան տեղի ունենար մինչև ապրիլյան ռազմական գործողությունները, մենք կարող էինք ասել, թե լրացուցիչ երաշխիքներ են փորձում ստանալ, բայց այս պայմաններում սա ինքնախաբեություն լինելուց բացի ևս մեկ անգամ գալիս է հաստատելու, որ մեր, այսպես կոչված, «իշխանություններն», անգամ ամենաթարմ նյութական հետևանքներից եզրակացություն անել չեն կարողանում»,- ասաց Հայրիկյանը:

«Հիմնադիր խորհրդարանի» անդամ Վարուժան Ավետիսյանի կարծիքով` ՀՕՊ համաձայնագիրը կապում է Հայաստանի «ձեռքերը».
«Այս տարիների ընթացքում Հայաստանն այդպես էլ ձեռք չի բերել կործանիչներ և կարիքի դեպքում դիմելու է ռուսական կողմին, ստացվում է, որ մենք տեխնիկապես այս համաձայնագիրը իրագործելու հնարավորություն չունենք, թեկուզ այն մասով, որով մեզ հնարավորություն տրված է: Բացի այս, ամենավտանգավորը հետևյալն է, այս համաձայնագրով, ինչ-որ չափով պաշտպանվում է բուն ՀՀ տարածքն Ադրբեջանի հավանական օդային ագրեսիայից, սակայն դրա փոխարեն Արցախն ի կեր է հանձնվում Ադրբեջանին, որովհետև մեր ձեռքերը կապվում են: Մտնելով մեկ համակարգի մեջ` մենք այլևս չենք կարողանա թեկուզ այսօրվա չափով օգնել Արցախի օդային պաշտպանությանը»:

Ակցիայի մասնակիցները պարզել էին «ՀՕՊ-ի հանձնում=Ստեփանակերտի ռմբակածում», «Մենք չենք վստահում Պերմյակովի բանակին, մենք վստահում ենք Հայոց բանակին», «Չենք հանձնելու ո’չ օդը, ոչ հողը» գրությամբ պաստառներ:

Ակցիան ավարտվեց, քանի որ ցուցարարներին միացավ ԱԺ ՀԱԿ խմբակցության պատգամավոր Նիկոլ Փաշինյանը, ով տեղեկացրեց, որ հարցն ԱԺ օրակարգում ներառված չէ:

Առավել մանրամասն` տեսանյութում: