Ցանկացած համաձայնագիր կնքվում է ՀՀ-ի շահերի համար, ոչ թե ընդդեմ որևէ մեկի. Կարեն Բեքարյան

2016թ. հունիսի 3-ին Հայաստանի Ազգային ժողովի արտաքին հարաբերությունների մշտական հանձնաժողովի նիստում քննարկվեց և դրական եզրակացություն տրվեց 2015թ. դեկտեմբերի 23-ին Մոսկվայում ստորագրված՝ «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրին:

Նշված համաձայնագրի շուրջ կարծիքները տարբեր են, ոմանք այն անվանում են « օդային տարածքի վաճառք» Ռուսաստանին, ոմանք համեմատություններ են տանում այն կառույցների հետ, որոնք ստեղծվել են Ռուսաստանի նախաձեռնությամբ (ՀԱՊԿ, ԵԱՏՄ) և ասում, որ ՀՕՊ համաձայնագիրը կշարունակի անարդյունավետության շարքը:

Newspress.am-ի հետ զրույցում ՀՀԿ խմբակցության պատգամավոր, Արտաքին հարաբերությունների մշտական հանձնաժողովի անդամ Կարեն Բեքարյանն ասաց, որ հնչած կարծիքներին համամիտ չէ:

Հարցին, թե արդյոք ՀՕՊ համաձայնագրի ստորագրումը խնդիրներ չի՞ առաջացնում ՆԱՏՕ-ի անդամ երկրների հետ հարաբերություններում, Կարեն Բեքարյանը պատասխանեց. «Ցանկացած համաձայնագիր կնքվում է Հայաստանի Հանրապետության շահերի սպասարկման համար, ոչ թե որևէ մեկի կամ ընդդեմ ՆԱՏՕ-ի: ՆԱՏՕ-ի հետ Հայաստանն ունի շատ նորմալ հարաբերություններ»:

Դիտարկմանը, թե Ռուսաստանի գլխավորած կառույցներն արդյունավետ չեն, իսկ ԵԱՏՄ-ն մեր անվտանգությունը չի ապահովում, ինչպես խոստանում էր իշխանությունը, ՀԱՊԿ-ը կարծես թե չի գործում, Կարեն Բեքարյանը չհամաձայնեց՝ ասելով, որ դրանք տարբեր կառույցներ են. «ԵԱՏՄ-ն տնտեսական կառույց է, ի՞նչ է նշանակում ԵԱՏՄ-ն չապահովեց մեր անվտանգությունը»,- հարցրեց Բեքարյանը, ում ի պատասխան նշվեց, որ դա իշխանության թիվ մեկ թեզն էր, երբ Հայաստանն անդամագրվում էր ԵԱՏՄ-ին:

Պատգամավորին հիշեցրինք, որ տարբեր պաշտոնյաներ բազմիցս են ասել, որ
անվտանգությունից ելնելով է, որ Հայաստանը պիտի անդամակցի ԵԱՏՄ-ին, որովհետև Հայաստանի համար առաջնայինն անվտանգությունն է:

«Ո՞վ էր ասում, ի՞նչ էր ասում, պետք է լինել հետևողական, որ արդյունքում մենք հանրությանն ապատեղեկատվություն չտանք: Այսինքն՝ ԵԱՏՄ-ն ունի ոչ ուղղակի առնչություն անվտանգության հետ, դրա սխեման շատ պարզ է: Այն անվտանգություն ապահովող կառույց չէ: Խնդիրը հետևյալն է. եթե դու՝ որպես ՀԱՊԿ անդամ, կարողանում ես ձեռք բերել զինատեսակներ և ռազմական գործին առնչվող ցանկացած բան արտոնյալ գներով՝ որպես ՀԱՊԿ անդամ, այդ արտոնյալ գների հետ կապված քո ստացած հնարավորությունը, օգուտը կարող ես կորցնել մաքսային սահմանի վրա, եթե դու ԵԱՏՄ անդամ չես, որովհետև դու ընկնելու ես այլ մաքսատուրքի տակ: Հետևաբար անվտանգության հետ կապվեց ԵԱՏՄ-ն»,-ասաց Բեքարյանը:

Պատգամավորի խոսքով՝ կիսատ և իրար միացրած ֆրազաները հանրության մոտ առաջացնում են այլ ակնկալիքներ. «Նման ընկալումները հակառակ ուղղությամբ են աշխատում: Հենց նույն քառօրյա պատերազմի ժամանակ բազմաթիվ մարդիկ, նույնիսկ սոցցանցերում էր տեսանելի, ակնկալում և պահանջում էին, որ ԵԱՏՄ-ն մեր անվտանգության հետ առնչություն ունենա: Ինչ վերաբերում է ՀԱՊԿ-ին, ապա ՀԱՊԿ-ի անդամ որևէ երկրի պարագայում չի եղել այն խնդիրը, որով լիներ տեսանելի ՀԱՊԿ-ի աշխատող կամ չաշխատող լինելը: Հայաստանի սահմաններին լայնամասշտաբ ագրեսիայի որևէ էլեմենտ չունենք, ինչ վերաբերում է այն բոլոր միջադեպերին, որտեղ ՀՀ պաշտոնական սահմաններին տեղի են ունենում, գործում է կանոնադրություն, որի համաձայն՝ ՀՀ-ն պետք է դիմի ՀԱՊԿ-ի օգնությանը, որպեսզի այն միջամտի: ՀՀ-ն երբևէ չի դիմել ՀԱՊԿ-ին որևէ օգնություն ստանալու համար»,- եզրափակեց պատգամավորը: