Մանդատը՝ անձեռնմխելիության թուղթ Ծառուկյանի համար

Պատգամավորական մանդատը հենց այնպես չի տրվում, դա ընտրողի կողմից տրված մանդատն է, որի միջոցով նույն ընտրողին հուզող հարցերն են բարձրացվելու և օրենսդրական լուծումներ տրվելու։

Հայաստանում որոշ պատգամավորներ երբեք քաղաքական թիվ մեկ ամբիոնին չեն մոտեցել, ավելին՝ կան նաև այնպիսիք, որ Ազգային ժողովի դահլիճ գալն ու նստելն իրենց համար ոչ պատվաբեր են համարում։

ԲՀԿ խմբակցության նախկին ղեկավար Գագիկ Ծառուկյանը 13 տարի է՝ պատգամավոր է և այդ ընթացքում 13 անգամ խորհրդարան չի ներկայացել, հետևաբար իրեն տրված մանդատը Ծառուկյանը չի արդարացրել։ Գագիկ Ծառուկյանի դեպքում մանդատը ծառայում է որպես անձեռնամխելիության թուղթ, իսկ Ազգային ժողովն այս կապակցությամբ ոչինչ չի անում։

Վերջերս ԱԺ նախագահ Գալուստ Սահակյանը Ծառուկյանի բացակայությունների վերաբերյալ հարցին ի պատասխան՝ ասաց, որ նա աշխատավարձ չի ստանա։

Վերջ, ընդամենը չի ստանա իր աշխատավարձը, որի կարիքը Ծառուկյանն ընդհանրապես չունի։ Բայց աշխատավարձ չստանալով՝ հարցը չի լուծվի, աշխատավարձը, որ չի ստանում, ընտրողներին վերաբերող հարցերն իրենք իրենց չեն հնչում, լուծում ստանում, գնում ամբիոնից բարձրաձայնվում։

Բացի այդ, լուրեր են շրջանառվում, որ Գագիկ Ծառուկյանը, ով քաղաքական դաշտը լքել էր փետրվարյան հայտնի իրադարձություններից հետո, կրկին ցանկանում է պատգամավոր դառնալ։ Համենայն դեպս,  այս լուրերը դեռ չեն հերքվել, սակայն, պատգամավոր դառնալու դեպքում՝ կրկին Ծառուկյանը չպիտի զբաղվի քաղաքականությամբ, չէ՞ որ պայմանն այդպիսին է։

Այստեղից արդեն ակնհայտ է, որ եթե Ծառուկյանը խորհրդարան չի գալու ու դեռ մի բան էլ այդ մասին խոսելու են, եթե աշխատավարձի կարիքն էլ չունի, ապա նրան հուզում է անձեռնմխելիության թուղթ ունենալու հարցը։

Ինչևէ, բարեգործից «թույն ընդդիմադիր» և մեկ գիշերվա ընթացքում իշխանության հավատարիմ բարեկամ դառնալը Ծառուկյանի համար կես քայլ էր: Որպես բարեկամության հավատարմագիր՝ Ծառուկյանին կտրվի անձեռնմխելիության թուղթը. թող գոնե դա ունենա ժամանակին բեմից այս կողմ մեկ անձի կողմից թելով նախագահի թեկնածու խաղացվող ԱԺ պատգամավորը։