ՀՅԴ-ն միշտ էլ լավն է. Աղվան Վարդանյան

ԱԺ ճեպազրույցները ՀՅԴ խմբակցության քարտուղար Աղվան Վարդանյանը սկսեց շնորհավորանքով, որն ուղղված էր լրագրողներին: Պատգամավորը նշեց, որ ևս մեկ նստաշրջան են լուսաբանել լրագրողները և վնասվածքներ չեն ստացել:

Դրան հաջորդեց լրագրողների հարցերը, թե արդյոք ՀՀԿ-ի համաձայնագրի ստորագրումից հետո ՀՅԴ-ն վնասվածքներ ստացե՞լ է, Աղվան Վարդանյանն ասաց, որ քաղաքական գործիչների գործն ավելի բարդ է. «Քաղաքական ուժերը վնասվածքներ ամեն օր են ստանում իրենց ամենօրյա գործի մեջ, կեցվածքի, վարվելակերպի մեջ: Եթե նկատել եք, վերջին շրջանում քաղաքական մթնոլորտն ավելի լարված է, որոշ ուժեր արդեն ընտրապայքարի մեջ են, անընդհատ խոսում են հարցեր են բարձրացնում, իսկ մենք ծանրակշիռ աշխատանքի կողմնակից ենք: ՀՀԿ-ի հետ համաձայնագիրը կապ չունի, ՀՅԴ-ն վնասվածքներ ստացել է»:

Հարցին, թե ՀՅԴ-ն հիմա՞ է ավելի լավը, թե՞ նախքան ՀՀԿ-ի հետ համաձայնագրի ստորագրումը, Աղվան Վարդանյանն ասաց. «ՀՅԴ-ն միշտ էլ լավն է»:

Հարցին, թե ՀՅԴ-ական նախարար Արծվիկ Մինասյանի՝ մենաշնորհների ցուցակ կազմելու մասին հայտարարությունն օդում կախված չի՞ մնա, Աղվան Վարդանյանը պատասխանեց. «Նախ մենաշնորհների դեմ գործընթացն սկսել է նոր Սահմանադրությամբ, երկրորդ փաստաթուղթը ՀՀ նախագահի ելույթն էր փետրվարին, որտեղ բոլոր թերությունները մատնանշված են և երրորդը բուն համաձայնագրի մեջ է: Արծվիկ Մինասյանը տասը և ավելի տարի եղել է ամենահրապարակային քաղաքական գործիչը, և այս հարցերի մասին նրանից ավելի պրոֆեսիոնալ ուրիշ քաղաքական գործիչ չգիտեմ: Հիմա նրա մի ասածից որոշ մարդիկ, լրատվականներ կախվեցվին և փորձում են Արծվիկ Մինասյանին դարձնել իր տեսակի հակառակը: Արծվիկ Մինասյանը սխալ բան չի ասել, ասել է այն, ինչ գրված է մեր նոր Սահմանադրությամբ»,- ասաց Վարդանյանը: