Յոլյանը` «Նաիրիտի» թաղման արարողակարգի «դուդուկահարը»

«Նաիրիտ» գործարանի աշխատակիցներն այսօր կառավարության շենքի մոտ բողոքի ակցիա էին անում: Պահանջում էին գործարանի վերագործարկում, աշխատավարձերի տույժերի ու տուգանքների վճարումը:

Նաիրիտցիներին զայրացրել էր այն, որ նախօրեին Էնեգետիկայի և բնական պաշարների նախարար Լևոն Յոլյանն ԱԺ-ի ամբիոնից նաիրիտցիներին է հորդորում ներդրողներ գտնել գործարանի համար:

Նաև հայտարարել էր, որ նախկին նաիրիտցիներից բաղկացած աշխատանքային խումբ է ստեղծվել, որին ինքը լիազորել է ներդրողներ գտնել:

Այս խնդիրը նաիրիտցիների համար անհասկանալի էր, թե ովքեր են այդ խմբում, և ովքեր կարող են ներդրողներ գտնել, ինչ է լինելու, ի վերջո, «Նաիրիտի» ճակատագիրը և այլն:

Նշենք, որ այս տարի «Նաիրիտ» գործարանում գույքագրում է կատարում հայաստանյան «Գրանթ Թորնթոն» աուդիտորական ընկերությունը։ Այն «Գրանթ Թորնթոն Ինթերնեշնլ» միջազգային կազմակերպության անդամ է։ «168 ժամի» աղբյուրների փոխանցմամբ՝ գույքագրման նախաձեռնողը ՀՀ Էներգետիկայի և բնական պաշարների նախարարությունն է, որն այդ աշխատանքի համար ընկերությանը վճարել է 115 մլն դրամ։

Ժամանակ առաջ նաիրիտցիների հետ հանդիպման ժամանակ Էներգետիկայի և բնական պաշարների փոխնախարար Լևոն Շահվերդյանն ասել Էր, թե պետք է տարանջատեն գույքն ու տարածքները, և այն, որը պետք է «Նաիրիտին» հետագայում վերագործարկման ժամանակ, փոխանցվելու է Երևանի ՋԷԿ-ին, իսկ այն մասը, որը պետք չէ, տալու են «Նաիրիտ 2»-ին։ Վերջինս պետք է վաճառի այդ գույքն ու հետ վերցնի նաիրիտցիներին վճարված աշխատավարձի գումարը։

Այսօր գործարանի հիմնական ունեցվածքը տարածքներն ու շենքերն են, քանի որ հնացած սարքավորումների վաճառքը բավարար գումար չի ապահովի։ Իսկ եթե գործարանին պատկանող ինչ-որ տարածք վաճառվի, խնդիր առաջանալու դեպքում դրա նոր սեփականատերը թույլ չի տա մտնել և իր տարածքում ինչ-որ աշխատանք անել։ Այսինքն` որևէ տարածքի կամ շենքի օտարումը նշանակում է` «թաղել» գործարանը։ Եթե կառավարությունն իսկապես գործարանն աշխատեցնելու խնդիր է դրել, ապա որևէ պայմանով չպետք է օտարում թույլ տա այնքան ժամանակ, մինչև ներդրողը չգա, չսկսի գործարանն աշխատեցնել, ու ինքը որոշի` ի՛նչն է պետք վաճառել, ինչը` ոչ։

Նշենք, որ մինչև այժմ կառավարությանը չի հաջողվում լուծել «Նաիրիտի» հարցը, քանի որ այնքան խճճված և բարդացած է, և կառավարությունը` նախկին նաիրիտցիների վրա հույս դնելով, որ ներդրողներ կգտնեն, ձեռքը գցել է փրփուրներին:

Մոտ 3 ամիս առաջ ՀՀ էներգետիկայի և բնական պաշարների նախարարն ասել էր, որ եթե լինի պոտենցիալ ներդրող, պետությունը պատրաստ է սառեցնել պարտքերը և վերագործարկել «Նաիրիտ» գործարանը:

Հիմա Յոլյանը փոշմանել է և ներդրող գտնելու առաքելությունը դրել է չաշխատող նաիրիտցիների ուսերին: Ասել է թե` հերթական նախարարը ձեռքերը լվաց Նաիրիտից և գործարանի վերագործարկման պատասխանատվությունը թողեց օդում կախված: