Իշխանությունն Ակադեմիան «դատապարտել է քոսոտ լինելու հեռանկարին»

Այսօր Ազգային ժողովում պատգամավոր Նիկոլ Փաշինյանն անդրադառնալով ԳԱԱ նախագահ Ռադիկ Մարտիրոսյանի հայտնի հարցազրույցին, որտեղ վերջինս Հայաստանը «քոսոտ» երկիր էր անվանել` Փաշինյանն ասաց. «80 տարեկան մարդուն ԳԱԱ-ի նախագահի պաշտոնում պահելը, կնշանակի` ԳԱԱ-ն դատապարտել քոսոտ լինելու հեռանկարին»:

ՀՀԿ խմբակցության ղեկավար Վահրամ Բաղդասարյանն իր հերթին անդրադարձավ պատգամավոր Նիկոլ Փաշինյանի դիտողությանն՝ ուղղված ԳԱԱ նախագահ Ռադիկ Մարտիրոսյանին. «Ամբողջ աշխարհն իր պատկառելի տարիքով գիտնականներին մեծարում է, ու ամբողջ աշխարհը թնդում էր նրանց աշխատանքով, իսկ մեզ մոտ եկել ու խոսում են տարիքից: Պետք չէ անհատների վրա կենտրոնանալ, մենք պետք է կարողանանք բացթողումները վերացնել»:

Նշենք, որ այս հարցուպատասխանի մեջ երկու կողմը ճիշտ է` և’ Նիկոլ Փաշինյանը, ով քննարկում է ԳԱԱ-ի նախագահի 80 տարեկան նշանակելու հարցը, և’ Վահրամ Բաղդասարյանը, ով շեշտում է, որ աշխարհն իր պատկառելի տարիքով գիտնականներին մեծարում է: Սակայն այստեղ Վահրամ Բաղդասրայանը մոռանում է, որ այդ աշխարահռչակ տարիքով գիտնականները նստում են լաբորատորիաներում և գիտնականների խումբ են ղեկավարում, ոչ թե գերատեսչությունում, որտեղ պահանջում է կառավարչական հմտություններ: Այստեղ գիտնականի մասին խոսք լինել չի կարող, քանի որ, վերջին հաշվով, կարող են գիտությամբ զբաղվել, և այդ աշխատանքները ղեկավարի կառավարիչը: Սակայն սա ևս երբեմն չի գործում, քանի որ լինելով այլ բնագավառի անձ` նա դժվարությամբ կհասկանա, թե գիտնականներն ինչի կարիք ունեն և ինչ է պետք` գիտությունն առաջ տանելու համար: Ինչևէ:

Եթե Ռադիկ Մարտիրոսյանը գիտնական է, ապա վարչական և կառավարչական աշխատանքները նրան խանգարում են, իսկ եթե այժմ զբաղված է միայն կառավարչական աշխատանքով, ապա գիտնական չէ, այլ ԳԱԱ նախագահի պաշտոնը զբաղեցնող անձ, ով իշխանությունն օգտագործում է ի շահ իրեն և քաղաքականացվում է: Ասել է թե` պաշտոն տալով` գիտնականին չես մեծարում:

Ինչ վերաբերում է Ակադեմիային, ապա նշենք, որ գիտնականների աշխատավարձն այնքան չնչին է, որ անգամ վայ-գիտնականներն ու բանակից մազապուրծ գիտությունների թեկնածուները չեն ցանկանում համալրել սոված գիտնականների շարքերը, իսկ գիտնականները փորձում են փող հայթայթել այս կամ այն նախագծի իրականացման համար, կամ էլ արտագաղթում են. սա Վահրամ Բաղդասարյանի հարազատ կուսակցության վերաբերմունքն է գիտության հանդեպ:

Իսկ որ Ռադիկ Մարտիրոսյանը գիտնականին, և առավել ևս, քաղաքական գործչին ոչ վայել արտահայտություններ է անում, ուրեմն ժամանակն է նրան թոշակի ուղարկել ուև նրա կերպարով գիտնականների կերպարը չմթագնելու: