2015թվականի բյուջեի կատարողականին կողմ կքվեարկի միայն ՀՀԿ-ն

Խորհրդարանում ամփոփվում է 2015 թվականի բյուջեի կատարողականի քննարկումը: 2015 թվականի պետական բյուջեի կատարողականի վերաբերյալ ԱԺ ՕԵԿ խմբակցության տեսակետը ներկայացրեց խմբակցության ղեկավար Հեղինե Բիշարյան:

Պատգամավորը գոհ չէր բյուջեի կատարողականից: Բիշարյանն ասաց, որ ինքը չի տեսնում ծրագիր, որը նպաստում է երկրի սոցիալ-տնտեսական վիճակի բարելավմանը, և քանի որ չեն լուծվել երկրում վխտացող խնդիրները, ՕԵԿ-ը դեմ կքվեարկի բյուջեի կատարողականին:

«Դաշնակցություն» խմբակցության ղեկավար Արմեն Ռուստամյանը կարևորեց մենաշնորհների դեմ պայքարը և ասաց, որ ռազմաարդյունաբերական համալիրի ամբողջացումն օրակարգային է դարձել. «2015 թվականին ներկայացված այս բյուջեին մենք դեմ ենք քվեարկել և բնական է՝ հիմա կողմ քվերակել չենք կարող: «Դաշնակցությունը» ձեռնպահ է լինելու»,- ասաց Ռուստամյանը:

ԱԺ ՀԱԿ խմբակցության անունից էլ խոսեց խմբակցության ղեկավար Լևոն Զուրաբյանը:

«Թեև մեկ տարի առաջ իշխանություն ասում էր, որ պետական պարտքի հետ կապված որևէ վտանգ չկա, միևնույն է` 2017 ՀՀ-ն կհատի 50 տոկոսանոց սահմանը: Բյուջեի կատարողականի ներկայացված հաշվետվությունը պարզ ցույց է տալիս, որ այս իշխանությունների միակ ծրագիրն անծրագիր պարտքերի փոխառություն է»,- ասաց Լևոն Զուրաբյանը և հավելեց, որ ՀԱԿ-ը դեմ է քվեարկելու:

ԲՀԿ խմբակցության պատգամավոր Միքայել Մելքումյանի կարծիքով` բյուջեի կատարողականը կառավարությունը դիտարկել է որպես ֆինանսական փաստաթուղթ, այլ ոչ թե քաղաքական նպատակադրումների փաստաթուղթ, իսկ ցուցանիշները 2015-ին ընթացքում վատացել են: Մելքումյանը տեղեկացրեց, որ ԲՀԿ-ն ձեռնպահ է քվեարկելու նախագծին:

ՀՀԿ խմբակցության անունից հանդես եկավ խմբակցության ղեկավար Վահրամ Բաղդասարյանը, ով իր ելույթում արձագանքեց պատգամավորների քննադատություններին և նկատեց, որ պատգամավորները քննադատում են կառավարությանը, իսկ իրենց համար հասկանալի է, որ պատգամավորները նախընտրական ելույթներ են ունենում: ՀՀԿ խմբակցության ղեկավարն ասաց, որ ՀՀԿ-ն կողմ է քվեարկելու բյուջեի նախագծին:

«Ժառանգություն» խմբակցության անունից ելույթ չունեցան: