Ինչո՞ւ կառավարության՝ ԵԱՏՄ-ում մաքսատուրքերի չափաբաժնի մասին կանխատեսումը չիրականացավ

Ֆինանսների փոխնախարար Պավել Սաֆարյանի խոսքով՝ ոչ բոլոր կանխատեսումներն են իրականություն դառնում, որովհետև կանխատեսումներում անորոշակիության տարր կա: Այս մասին կառավարությունում լրագրողների հետ զրույցում ասաց Սաֆարյանը` անդրադառնալով ԵԱՏՄ-ի շրջանակներում Հայաստանին բաժին հասնող մաքսատուրքերի չափաքանակի նվազմանը:

Հարցին, թե ԵԱՏՄ-ի շրջանակներում Հայաստանին բաժին հասնող մաքսատուրքերի քանակը չի հասնում սահմանված չափին, որը կանխատեսել էր ՀՀ կառավարությունը, և ավելին` դեռ նվազում է, փոխնախարարն ասաց. «ԵԱՏՄ-ի մեջ միայն Հայաստանը չէ, և անդամ բոլոր երկրները այդ նույն կանխատեսումներն ունեին, ինչ-որ ներկայացրել էր ՀՀ կառավարությունը: Այսինքն` ԵԱՏՄ անդամ երկրների կառավարությունների կանխատեսումներն այնպիսին էին, ինչպիսին Հայաստանինը»:

Այնուհետև Պավել Սաֆարյանը սկսեց բացատրել կանխագուշագել և կանխատեսել բառերի «ծագումնաբանությունը ». «Եթե դուք գուշակի մոտ եք գնում, և նա ձեզ ոչ ճիշտ բան է ասում, ապա դուք կարող եք նրանից նեղանալ, սակայն կանխատեսումը որոշակի մեթոդիկայով կատարվող գործողություն է, որի մեջ կան նաև անորոշության գործոններ, որոնք կանխատեսել հնարավոր չէ»:

Սաֆարյանի խոսքով՝ մաքսատուրքերի վերաբերյալ կանխատեսումը, որն արվել էր 2014-ին, արվել էր այն մեթոդիկայով, որոնք կային, հետո այդ իրողությունները ենթարկվեցին որոշակի փոփոխության, որը կանխատեսողների մեղքով չէր:

Հարցին, թե այնուամենայնիվ մաքսատուրքերի քանակը շարունակելո՞ւ է նվազել, Պավել Սաֆարյանը պատասխանեց. «Վստահ չեմ, չեմ կարծում, որ կնվազի»: