ՀՕՊ համաձայնագրի հնարավորությունները՝ ըստ Շավարշ Քոչարյանի

ՀՀ փոխարտգործնախարար Շավարշ Քոչարյանի խոսքով՝ ՀՕՊ համաձայնագրին կարելի է երկակի մոտեցում ցուցաբերել. «Մամուլում էլ կան վերլուծություններ, որտեղ նշում են թերի և դրական կողմերը, այնպես որ` ամեն ինչ կապված է իրականում այդ ամենի իրագործումից»,- կառավարությունում լրագրողների հետ զրույցում ասաց Քոչարյանը:

Հարցին, թե մտավախություն կա, որ ՀՕՊ համաձայնագրով Հայաստանի տարածքի անկախությունը վերանում է, Շավարշ Քոչարյանը պատասխանեց. «Դա էդքան էլ այդպես չէ: Իրականում դա այդպես չէ: Կա նաև դրա երկրորդ կողմը: Մենք շատ մանրակրկիտ հնարավորություն ենք տալու դիտարկել մեզ ամբողջ շրջապատող տարածքը: Այսինքն՝ մենք ինքներս դեռևս այն հնարավորությունը, որը տալիս է տեխնիկան, չունենք: Իսկ այդ հնարավորությունը՝ բավականաչափ դետալացված դիտարկելու համար ամբողջ մեզ շրջապատող տարածքը,  կարծում եմ, կարևոր է»:

Անդրադառնալով Գերմանիայի կողմից Հայոց ցեղասպանության վերաբերյալ բանաձևի ընդունմանը` Շավարշ Քոչարյանն ասաց, որ Բունդեսթագի կողմից Հայոց ցեղասպանության բանաձևի ընդունումը չափազանց կարևոր է, կարևոր է այն հանգամանքով, որ Գերմանիան ընդունեց , որ ինքը հանդիսացել է մեղսակից այդ հանցագործությանը և երբ մեղսակիցն է ընդունում իր մեղքը, իսկ բուն հանցագործություն կատարողը ժխտում է, դա արդեն դառնում է առնվազն տարօրինակ: Հայաստանի նպատակն այն է, որ Թուրքիան ճանաչի Հայոց ցեղասպանությունը: