Ալիևի՝ Գերմանիայում արած հայտարարության կարճ տեքստում վեց բացահայտ կեղծիք կար. Շավարշ Քոչարյան

Ալիևի՝ Գերմանիայում արված հայտարարության կարճ տեքստում վեց բացահայտ կեղծիք կար: Այս մասին այսօր կառավարությունում լրագրողների հետ զրույցում ասաց ՀՀ փոխարտգործնախարար Շավարշ Քոչարյանը:

Հարցին, թե ինչո՞ւ է ադրբեջանական կողմը պնդում, որ հայկական կողմի խնդրանքով է դադարեցվել ապրիլյան ռազմական գործողությունները, Շավարշ Քոչարյանը պատասխանեց. «Իրենց ստերն անվերջ են և հավերժ, կրկին պնդում են, որ միջազգային իրավունքով իրենց տարածքային ամբողջականությունն է առաջնային, այնինչ ճիշտ հակառակն է: Նույնիսկ Գերմանիայում Ալիևի կարճ հայտարարության մեջ առնվազն վեց բացահայտ կեղծիք կար»:

Հարցին, թե ի՞նչ դիրքորոշում ունի Հայաստանը հետախուզության մեխանիզմենրի դիրքորոշման վերաբերյալ և արդեն հայտնի՞ է եզրակացությունը, փոխարտգործնախարարն ասաց, որ հայկական կողմը միշտ կողմնակից է բոլոր այն մեխանիզմներին, որոնք կապված են զինադադարի ամրապնդման հետ. «Դա վերաբերում է և՛ հետաքննության մեխանիզմին, և՛ դիպուկահարների հետքաշմանն ու բուն մոնիթորինգային գործընթացին, այսինքն` Կասպշիկի աշխատակազմի կարողությունների ավելացմանը, լինի մարդկանց թվաքանակը, թե սարքեր, որովհետև անվերջ, երբ մեկը բացահայտ կերպով խախտում է, ու բոլորը գիտեն` ով է խախտողը, բայց մյուս կողմից հնչում են ոչ հասցեագրված կոչեր, դա արդեն դարձել է անմեղսունակ»,- ասաց Քոչարյանը:

Փոխարտգործնախարարը հայտնեց, որ կողմերն արդեն բացահայտ փաստաթղթեր են քննարկում, ինչից էլ հայտնի կդառնա, թե արդյոք Ադրբեջանը պատրաստ է գնալ այդ ճանապարհով: