Սերգո Կարապետյանն ազատվեց իր համար անցանկալի փոխնախարարներից

ՀՀ վարչապետ Հովիկ Աբրահամյանի որոշումներով` ՀՀ գյուղատնտեսության փոխնախարարներ Գրիշա Բաղիյանը, Սամվել Գալստյանը և Գառնիկ Պետրոսյանն ազատվել են զբաղեցրած պաշտոններից:

Արմեն Հարությունյանն ու Ռոբերտ Մակարյանը պահպանել են փոխնախարարի պաշտոնները:

Աշխատանքից ազատված փոխնախարարները երկար տարիներ համակարգում են և համարվում էին ոլորտում հնաբնակներ:

Հիշեցնենք` երբ խոսք կար կառավարությունում կրճատումների վերաբերյալ, խոսակցություններ կային, որ առաջինը հենց ՀՀ գյուղատնտեսության նախարար Սերգո Կարապետյանն է կրճատումների ցուցակը ձեռքին շտապել կառավարություն:

Լուրեր են պտտվում, որ գյուղնախարարի հետ այնքան էլ հեշտ չէ աշխատելը, քանի որ գյուղատնտեսությունը այնպիսի ոլորտ է, որ կախված է բնության անակնկալներից և ոչ միշտ է թողնում ոլորտը կայուն զարգանա: Իսկ ցանկացած խնդրի բարձրաձայնում ծանր է նստում գերատեսչության պաշտոնյաների վրա:

Ինչպես երևում է, կրճատումներ կոչվածը երկսայրի սուր է, նախ այն գործիք է անցանկալի աշխատակիցներից ազատվելու համար, հետո նաև` լավ աշխատելու իմիտացիա:

Դժվար է ասել, թե այս երեք փոխնախարարներից ազատվելը որքանով կնպաստի ոլորտում փոփոխությունների և բարելավման, սակայն միանշանակ է, որ ցանկալի աշխատակիցներ չէին, հատկապես որ Սամվել Գալստյանին ու Գրիշա Բաղիյանին «փաթաթել» էին Սերգո Կարապետյանի վզին և լինելով «սովետական» աշխատողներ` հենց այս տրամաբանությամբ էլ ոլորտում գործում էին:

Ինչ վերաբերում է Ռոբերտ Մակարյանին` նա կարողանում է ժամանակին խոսել և ժամանակին լռել, իսկ Արմեն Հարությունյանը զբաղվում է միջազգային համագործակցության հարցերով: Իհարկե, առանց Արմեն Հարությունյանի էլ միջազգային համագործակցությունը կկայանա, իսկ թե ինչու պահեց նրան գյուղնախը, երևի միայն ինքը գիտի: Սակայն մեծ կորուստ չէի լինի նաև Արմեն Հարությունյանի կորուստը, իսկ Ռոբերտ Մակարյանը գոնե կարողանում է ժամանակ առ ժամանակ Սերգո Կարապետյանի երեսը պարզեցնել, իսկ պայմանագրեր ստորագրող միշտ էլ կգտնվի, միայն պայմանագիր լինի: Այնպես որ անցանկալի հնաբնակներից ազատվեց Սերգո Կարապետյանը, և սա կոչվում է կրճատում: