Սահմանադրական հանրաքվեի մասին գնահատականը կհրապարակվի առաջիկայում. ՄԻՊ

«Ես այս պահի դրությամբ իրավական տեսանկյունից նման պնդում անելու հիմք չունեմ: Գործերը, որոնց վերաբերյալ հարց է տրվում, դեռևս քննության փուլում են»: Այս մասին կառավարությունում լրագրողների հետ զրույցում ասաց ՀՀ ՄԻ պաշտպան Արման Թաթոյանը` պատասխանելով այն հարցին, թե արդյոք Հայաստանում կա՞ն քաղբանտարկյալներ:

Դիտարկմանը, թե Շանթ Հարությունյանի գործը քննության փուլում չէ, Արման Թաթոյանն ասաց. «Բոլոր հարցերով մենք ուսումնասիրություն կատարում ենք, դրա համար ես հատուկ նշում եմ՝ այս պահի դրությամբ: Բոլոր գործերով էլ առանձին գործեր կան, որոնց քննության ընթացքին մենք հետևում ենք»:

Անդրադառնալով այն հարցին, որ Մարդու իրավունքների նախկին պաշտպան Կարեն Անդրեասյանի կողմից չներկայացվեց Սահմանադրական հանրաքվեի արդյունքները, Արման Թաթոյանն ասաց. «Դա գտնվում է ամփոփման փուլում, դրանք առաջիկայում կհրապարակվեն: Դա լինելու է վերլուծության գնահատականի տեսքով»:

Հարցին, թե նշանակման փուլում ինքը հայտարարում էր, որ կաշկանդվածություն չի ունենալու, հասարակության մեծ մասի տեսակետն այն է, որ ՄԻՊ-ն իշխանության մարդն է և կաշկանդված է, Արման Թաթոյանը չհամաձայնեց. «Ես կաշկանդված չեմ և որևէ կաշկանդվածություն չունեմ, սակայն ՄԻՊ-ն ունի հստակ կարգավիճակ և գործում է իր կարգավիճակի սահմաններում, որովհետև ՄԻՊ-ի օրենք գոյություն ունի, որն էլ սահմանում է կոնկրետ լիազորություններ»:

Արման Թաթոյանը նշեց, որ ՄԻՊ-ի մասին օրենքով արգելվում է Պաշտպանին որևէ հայտարարություն անել, գործողություն կատարել այն բոլոր գործերով, որոնցով ընթանում է դատական գործ, ՄԻՊ-ը նաև իրավունք չունի քննարկելու բոլոր այն գործերը, որոնք ենթակա են լուծման` դատական կարգով: