Եթե պատժեն Միհրան Պողոսյանին` ես ինձ բավարարված կզգամ. Վահագն Խաչատրյան

«Կարծում եմ` այդ սկանդալը պատահական չէր, քանի որ ակնհայտ է, որ դա հանրությանը հանգստացնելու համար արվեց»:
ԴԱՀԿ նախկին պետ Միհրան Պողոսյանի օֆշորային սկանդալում հայտնվելու փաստն այդպես է որակում քաղաքական վերլուծաբան Ստյոպա Սաֆարյանը: Այս կարծիքն ակնհայտորեն համընկնում է իրականության հետ, քանի որ ԴԱՀԿ նախկին պետի` աշխատանքից ազատվելուց հետո ոչ մի լուր չկա` չնայած այն հանգամանքին, որ «Պանաման նվաճած» հայ գեներալը պետք է խոսեր արդեն ոչ թե որպես պաշտոնյա, այլ հասարակ քաղաքացի:

«Ես բազմիցս ասել եմ՝ մինչև պետական պաշտոնյա լինելը, ես բիզնեսներ եմ ունեցել, բայց ես` որպես պետական պաշտոնյա, ոչ մի բիզնես չունեմ»,-ամեն անգամ այսպես էր ասում Միհրան Պողոսյանը, երբ հարցը վերաբերում էր իր բիզնեսներին: Սակայն բիզնես չունենալու` Միհրան Պողոսյանի բոլոր պնդումները, փաստորեն, ոչ միայն իրականությանը չէին համապատասխանում, այլև փաստում էին նրա հեռատեսության մասին:

«Կարգավիճակի շահարկման արդյունքում կասկածելի ծագման հարստություն դիզելու հետևանքով աշխարհի բոլոր երկրներում մարդիկ պատասխանատվության ենթարկվեցին: Ես սպասում եմ իրավապահ մարմինների արձագանքին, թեպետ այդ հարցում այնքան էլ լավատես չեմ»,- Newspress.am-ի հետ զրույցում ասաց քաղաքական վերլուծաբան Ստյոպա Սաֆարյանը:

Տնտեսագետ Վահագն Խաչատրյանն էլ անդրադառնալով նույն թեմային` նկատեց, որ եթե, ամեն դեպքում, նախկին պաշտոնյային որոշեն պատժել, ապա դա բավականին մեծ ազդեցություն կունենա մեր երկրի պաշտոնյաների վրա, քանի որ նրանք վերջապես կիմանան, որ ապօրինի հարստություն դիզելու համար մի օր պատժվելու են:

«Դեռևս չեմ կարող ասել, թե դատարանն ինչ կորոշի: Մեկնաբանելու բան կարծում եմ` չկա: Մի բան պարզ էր, որ այդ պաշտոնյան զբաղվում էր գործարարությամբ, բոլորս էլ այստեղ ենք ապրում, և գիտենք, որ բանանի ներկրման մենաշնորհն իրենն էր, երևի բախտը չբերեց: Մի բան պարզ է, որ այդ պաշտոնյան օրենքից դուրս է գործել: Ես չեմ կարող դատավորի պարտականությունը վերցնել ինձ վրա, բայց եթե դատարանը որոշի պատժել, մեր երկրում օգուտը կլինի այն, որ մարդիկ կիմանան` պատժում են դրա համար: Անձամբ ես դրանից ինձ բավարարված կզգամ»,- եզրափակեց Խաչատրյանը: