Կոշկեղենն ու կահույքը թանկացել են. ԱՎԾ

2016թ. մայիսին ապրիլի համեմատ ոչ պարենային ապրանքների շուկայում գրանցվել է 0.6% գնանկում, ինչը մեծապես պայմանավորվել է մշակույթի ապրանքների՝ 2.2%, հագուստի և գործվածքի՝ 1.7%, լվացող միջոցների՝ 1.4%, գեղահարդարման ապրանքների՝ 1.3%, վառելիքի` 0.9%, տեքստիլեղենի՝ 0.6%, ոսկերչական ապրանքների 0.6% գնանկումով:

Դեղամիջոցների գները նշված ժամանակահատվածում նվազել են 0.3%-ով, գորգեղենինը՝ 0.2%-ով, շինանյութերինը՝ 0.1%-ով: Միաժամանակ, հանրապետությունում արձանագրվել է այգեգործական ապրանքների՝ 0.2%, կոշկեղենի՝ 0.5 %, կենցաղային էլեկտրաապրանքների՝ 1.1%, կահույքի 1.2% գնաճ, իսկ խոհանոցային սպասքի, գրենական պիտույքների ապրանքախմբերում գների մակարդակը նախորդ ամսվա համեմատ մնացել է անփոփոխ:

2016թ. մայիսին ապրիլի համեմատ հանրապետությունում գրանցվել է բենզինի՝ 0.5% գնաճ և դիզելային վառելիքի 2.9% գնանկում: 2016թ. մայիսին 2015թ. մայիսի համեմատ բենզինի և դիզելային վառելիքի գները նվազել են համապատասխանաբար 11.6% և 16.8%-ով, իսկ 2015թ. դեկտեմբերի համեմատ` 11.0% և 17.6%-ով:

Հանրապետության դիտարկված 5 քաղաքներում 2016թ. մայիսին ապրիլի համեմատ արձանագրվել է ոչ պարենային ապրանքների 1.0-0.2% գնանկում, իսկ 6-ում՝ 0.2-1.2% գնաճ: Մայրաքաղաքում ոչ պարենային ապրանքների գները նվազել են 1.0%-ով: