«Նաիրիտի» գույքը գույքագրվո՞ւմ է մի մասով պարտքը փակելու համար. պարզաբանում է նախարարը

ԱԺ-կառավարություն հարցուպատասխանի ժամանակ ՀԱԿ խմբակցության ղեկավար Լևոն Զուրաբյանը կրկին կառավարության ուշադրությունը հրավիրեց «Նաիրիտի» վրա:

Լևոն Զուրաբյանն անդրադառանալով մարտի 11-ին «Նաիրիտի» հարցերով ձևավորված աշխատանքային խմբին, հարցրեց. «Խումբը պետք է ուսումնասիրություններ ներկայացներ գործարանի ներկա և հետագա աշխատանքի վերաբերյալ, բայց մինչ օրս չի հրապարակվել, իսկ հունիսի 6-ին «Նաիրիտի» գրեթե ողջ անձնակազմը աշխատանքից ազատվելու վերաբերյալ գրություններ է ստացել, բացի այդ կատարվել է նաև ողջ գործարանի գույքագրում: Ի՞նչ եզրակացության է հանգել աշխատանքային խումբը, ի՞նչ նպատակով է գործարանի գույքի գույքագրվել»:

Հարցին պատասխանող` Էներգետիկայի և բնական պաշարների նախարար Լևոն Յոլյանն ասաց, որ աշխատանքային խմբից դեռևս առաջարկություն չի եղել վերագործարկման համար.

«Հաշվի առնելով, որ «Նաիրիտը» կաուչուկի արտադրություն էր իրականացնում, որի վերաբերյալ ընդամենը տասը կամ մի քիչ ավելի շատ կազմակերպություն կարող էին հետաքրքրություն դրսևորել, աշխատանքային խմբին ներկայացվել է, որ եթե լինի քիչ թե շատ իրատեսական առաջարկ, ներկայացնել անձամբ ինձ՝ հետագա գործերը պլանավորելու համար: Տեղեկացնեմ, որ դեռ «Նաիրիտ»-ի վերագործարկման վերաբերյալ որևէ առաջարկ չի եղել»,- ասաց նախարարը:

Գույքագրման վերաբերյալ ՀՀ էներգետիկայի և բնական պաշարների նախարարը պատասխանեց, որ պայմանավովածություն ունեն ԱԻՆ-ի հետ՝ դրանց վնասազերծման համար:

Անդրադառնալով պատգամավորի այն դիտարկմանը, թե արդյոք կառավարությունը դադարեցնո՞ւմ է «Նաիրիտի» աշխատակիցների աշխատանքը, Լևոն Յոլյանը պատասխանեց, որ այն դադարեցվել է 2010 թվականի մարտից, և մինչ օրս կաուչուկի արտադրություն չկա գործարանում:

Լևոն Զուրաբյանն արձագանքեց, որ նախարարի գրավոր պատասխանը տպավորություն է ստեղծում, որ նախարարը փորձում է թաքցնել ճշմարտությունը, և իր տեղեկությունների համաձայն՝ ողջ գործարանի գույքն է գույքագրվում, այլ ոչ թե միայն պայթյունավտանգ նյութերը:
«Կան տեղեկություններ, որ գույքագրման նպատակը 2 մասի կիսելն է, և պարտքի դիմաց պետք է տրվի Երևան ՋԷԿ-ին, մյուսը՝ Նաիրիիտ-2-ին, և դրանով փակվի պահպանությունը»,-ասաց Զուրաբյանը:

Լևոն Յոլյանն ի պատասխան ասաց, որ ինքը ներկայացրել է իրական իրավիճակը: