Վաղը կկրճատվի երեք-չորս փոխնախարար. Հովիկ Աբրահամյան

Կառավարության հետ հարցուպատասխանի ժամանակ ՀԱԿ խմբակցության ղեկավար Լևոն Զուրաբյանը հարց բարձրացրեց կառավարության կողմից ՀԿ-ներին նվիրատվություն անելու մասին հարցին, որի ընդհանուր գումարն անցնում է 9 մլրդ դրամից:

«1 մլրդ դրամ ուղղված է բավականին կասկածելի նպատակների համար, որի գլխավոր նպատական էր ապահովել ՀՀԿ-ի քաղաքական հենարանը:

Բոլորիս հայտնի է, թե ում է պատկանում «Հայաստանի երիտասարդական հիմնադրամը» (ՀՀԿ-ական պատգամավոր Կարեն Ավագյանին,-խմբ.) ստացել է 120 մլն դրամ ՀՀ բուհերին կրթաթոշակ նշանակելու և երիտասարդ գիտնականներին օժանդակելու համար, սակայն դա ընդամենն ապահովում է ՀՀԿ-ի երիտթևի ամրապնդումը բուհական համակարգում»,- ասաց Լևոն Զուրաբյանը և ներկայացրեց թվերի շարան, որոնք, ըստ պատգամավորի, կասկածելի են:

«Նման գումարներ դուրս են գրվել անհասանալի հասցեներով և չեն ծախսվել: Արդյո՞ք ավելի լավ չէ այդ գումարը ծախսել բանակի համար և այդ գումարով ձեռք բերել 800 ջերմադիտակ: Արդյոք ժամանակը չէ՞ դադարեցնել պետբյուջեից գումարների դուրսգրումն` իշխող կուսակցության ամրապնդման նպատակով»,- հարցրեց Զուրաբյանը:

ՀԱԿ խմբակցության ղեկավարին պատասխանեց ՀՀ վարչապետ Հովիկ Աբրահամյանը. «Հիմնադրամի հետ կապված` ՀՀԿ-ն անհրաժեշտություն չունի գումար ներդնել և ծախսել իր PR-ի համար, այդ թվերը որ հնչեցվեցին, դրանց պատասխանը գրավոր մանրամասն պատասխան կուղարկեմ»:

Այնուհետև վարչապետը հիշեցրեց, որ սկսվել է նոր գործընթաց, և կան գործիչներ, ովքեր դեռ չեն հավատում կառավարության հայտարարությանը կրճատումների և խնայողությունների վերաբերյալ, սակայն վարչապետն ասաց, որ իրենք ամեն ինչ կապացուցեն գործով:

«Մենք ծրագիր են դրել մեր առաջ, քայլ առ քայլ իրականացնելու ենք, ուղղակի չպետք է ակնկալել, որ մեկ հարվածով բոլոր խնդիրները լուծվելու են, ժամանակ է պետք, դուք արդյունքները կտեսնեք: Օրինակ` կսկսվեն կրճատումներ, այսօր կրճատվել է մեկ փոխնախարար, վաղը կկրճատվեն ևս 3-4 փոխնախարարներ»,- ասաց վարչապետը:

Ի պատասխան` Լևոն Զուրաբյանն ասաց, որ ամբողջ աշխարհում ՀԿ-ները ոչ կառավարական կազմակերպություններ են և այն պահից, երբ կառավարությունը սկսում է ֆինանսավորել ոչ կառավարական կազմակեպություններին, դրանք դադարում են լինել ոչ կառավարական. «Այս պրակտիկան բերում է նրան, որ իշխանությունը չարաշահում է անում: Հուսով եմ` այս պրակտիկան կդադարի»,- ասաց Զուրաբյանը: