Դավիթ Հարությունյանը կաշառքի գործով խորհուրդ տվեց դիմել իրավապահներին

Այսօր Երևանում Համաշխարհային բանկը ներկայացրեց Հանքարդյունաբերության ոլորտի կայունության ռազմավարական գնահատում-Հայաստան զեկույցը, որտեղ Բանկի կողմից իրականացված ուսումնասիրությունը ներկայացնում էր հանքարդյունաբերության ոլորտով պայմանավորված տնտեսական աճի հեռանկարներն, առաջ քաշում հանքարդյունաբերության ազգային քաղաքականության անհրաժեշտություն` կայուն զարգացման ոլորտի ներդրումն առավելագույնի հասցնելու նպատակով: Գնահատումն իրականացվել էր ՀՀ կառավարության առաջարկության հիման վրա, և շնորհանդեսին ներկա էր ՀՀ կառավարության աշխատակազմի ղեկավար-նախարար Դավիթ Հարությունյանը:

Նշենք, որ վերջերս մամուլում շրջանառվում էր 10 հանքի լիցենզիա ստանալու համար հայտնի գործարար Սիլվա Համբարձումյանի` նախկին բնապահպանության նախարար Արամ Հարությունյանին 14 մլն դոլար կաշառք է տալու հարցը:

Newspress.am-ը Դավիթ Հարությունյանից հետաքրքրվեց, թե այդ տեղեկության հիման վրա, արդյոք հանքարդյունաբերության ոլորտում լիցենզիաների տրամադրման առումով արդարություն կա՞: Դ. Հարությունյանը պատասխանեց, որ հարցը կոռեկտ չէ, թեև հարցն ուղղված չէր ղեկավար-նախարարի վերաբերմունքը դեպի կաշառքի փաստը, այլ պարզապես ոլորտային հարցերի հստակությունն էր ակնկալիքը:

Այնուհետև Դավիթ Հարությունյանը պարզաբանեց, թե ինչու կոռեկտ չէ, քանի որ հարցի մեջ պարունակում են փաստեր, որոնք չի կարող ո’չ հաստատել, ո’չ հերքել:

Նա խորհուրդ տվեց դիմել դիմացի մայթի վրա գտնվող համապատասխան շենք, որտեղ իրավապահ մարմիններն են և հարցն ուղղել նրանց:

Նշենք, որ վերջին շրջանում կառավարությունը որոշել է ակտիվ պայքարել կոռուպցիայի դեմ, սակայն, ինչպես երևում է, երկրում կոռուպցիոն երևույթներից տեղյակ չէ, և այդ ուղղությամբ լավագույնս տեղեկացված են իրավապահ մարմինները, և կառավարությունն անգամ չի ցանկանում դիմել իրավապահներին, որ իմանան, թե ում դեմ պայքարեն:

Նշենք, որ Սիլվա Համբարձումյանի կաշառք տալու վերաբերյալ տեղեկությունները բավական ժամանակ է` շրջանառվում է մամուլում:
Հիշեցնենք, որ «Հրապարակ» թերթը գրել է, որ Հատուկ քննչական ծառայությունը դեռևս 2015թ. օգոստոսից քննում է գործարար Սիլվա Համբարձումյանի հաղորդումը, որտեղ նա հայտնել է, որ 2008թ. 10 հանքի շահագործման լիցենզիա ստանալու համար 14 մլն. դոլար կաշառք է տվել բնապահպանության նախարար Հարությունյանին։

Էներգետիկայի և բնական պաշարների նախարար Արմեն Մովսիսյանը կասեցրել էր լիցենզիաները, Արամ Հարությունյանն էլ ձեռքերը լվացել է, ինչից հետո տիկինը դիմել է իրավապահներին։

Այս դեպքը հրաշալի փորձաքար է կառավարության համար, թե ինչպես իրեն կդրսևորի իր կողմից հայտարարած պայքարը սկսելու համար, սակայն, ինչպես երևում է Դավիթ Հարությունյանի պատասխանից, կառավարությունը կոռուպցիայի դեմ պայքարելու համար, ինչպես լրագրողները, պետք է դիմի իրավապահներին:

Կարճ ասած, Հայաստանում կոռուպցիայի դեմ պայքարելու համար լրագրողները պետք է պայքարեն իրավապահների հետ միասին, իսկ կառավարությունը ի վերջո մամուլից կամ կիմանա կոռուպցիայի մասին փաստը, կամ էլ` ոչ. Կառավարությունը կոռուպցիոն պայքարի հարցով դեռևս որևէ փորձ չունի, իսկ փորձել երևի թե դեռ չի ցանկանում, իսկ կոռուպցիայի դեմ պայքար հայտարարելը պետք է Եվրոպայից դրամաշնորհներ ներգրավելու, ծախսելու և Եվրոպայի աչքերին սամում փչելու համար: