ԱԱԾ տնօրեն Գեորգի Կուտոյանն ո՞վ է, որ ասի՝ չեմ գալիս. Նիկոլ Փաշինյան

Խորհրդարանում շարունակվում է 2015 թվականի պետական բյուջեի կատարողականի քննարկումը, որի հարակից զեկուցողն ԱԺ ֆինանսավարկային և բյուջետային հարցերի հանձնաժողովի նախագահ Գագիկ Մինասյանն է:

ՀԱԿ խմբակցության պատգամավոր Նիկոլ Փաշինյանը հարց ուղղելիս` նախ նկատեց, որ սա այս բյուջեի կատարողականի վերջին քննարկումն է, և նշեց, որ դեռ 2012 թվականից ֆիքսել է, որ բյուջեի կատարողականը ոչ թե հաշվապահական թղթեր են, այլ դա քաղաքական փաստաթուղթ է:

Անդրադառնալով մարզպետների կողմից բյուջեի կատարողականը ներկայացնելուն`  Փաշինյանն ասաց. «Մարզպետները ոնց որ ասելիս լինեին՝ ջնջել եմ պետական բյուջեն, շահել եմ 3 միլիարդ դրամ: Հանձնաժողովներում այդպես էլ չհաջողվեց քաղաքական քննարկում ծավալել: Կառավարությունը զեկուցելու է ուղարկում գլխավոր գանձապետին, ով գումարների ո՛չ հավաքագրման, ո՛չ էլ ծախսման քաղաքական պատասխանատուն չէ»:

Ինչ վերաբերում է պաշտոնյաների մասնակցությանը հանձնաժողովի նիստերին, ԱԺ-ում քննարկումներին, պատգամավորը մեջբերեց ԱԺ որոշումը, ըստ որի՝ պետք է Արտակարգ իրավիճակների նախարարը, ոստիկանության պետը գային հանձնաժողով և հանդես գային հիմնական զեկուցողներ, թեև նրանցից որևէ մեկը չի ներկայացել:

Փաշինյանը դա վերագրում է խորհրդարանի և կառավարության հարաբերությունների խնդրին, ինչով կառավարոււթյունը ցույց է տալիս, որ խորհրդարանի հետ վասալային հարաբերություններ են. «Ո՞վ է օրինակ Ազգային անվտանգության ծառայության տնօրեն Գեորգի Կուտոյանը, որ իրեն դնի Ֆրիդրիխ Էնգելսի տեղը և ասի, որ չեմ գալիս և չեմ զեկուցում»,- ասաց Փաշինյանը:

Գագիկ Մինասյանը չհամաձայնեց պատգամավորի հետ: Ըստ նրա՝ վերջին հինգ տարվա ընթացքում բյուջետային քննարկումների որակն էապես փոխվել է: