Վիզաների կենտրոնում քաղաքացիներն անցնում են Գողգոթայի ճանապարհով. Նաիրա Զոհրաբյան

ԱԺ հայտարարությունների ժամին ԲՀԿ խմբակցության ղեկավար Նաիրա Զոհրաբյանը որպես Եվրոպական ինտեգրման հանձնաժողովի նախագահ` անդրադարձավ վիզաների կենտրոնում տիրող իրավիճակին:

ԲՀԿ ղեկավարը տեղեկացրեց, որ իրեն են դիմել ՀՀ քաղաքացիներ` հայտնելով, որ վիզայի կենտրոններում նվաստացուցիչ գործընթաց է անցկացվում, և իրենք ստիպված են անցնել Գողգոթայի ճանապարհով.

«Ընթանում է նվաստացուցիչ պրոցես՝ վիզայի թույլտվություն ստանալու համար: Միգուցե փորձն այլ երկրներից է վերցված, բայց ասենք, որ մեզ մոտ չի աշխատում այդ մոդելը: Մեր հայրենակիցիներին ինչ-որ ժամ են նշանակում, բոլորին մի սենյակ են մտցնում գետտոյի նման, և բոլոր ընտանիքի անդամներին` ծծկեր երեխայից մինչև N տարիքի երեխա, պետք է այսպես նվաստացման Գողգոթա անցնեն, մինչև գա հերթը և մի աշխատակից ժամերով քո փաստաթղթերը նայի, որը տևում է մի քանի ժամ, իսկ մյուսները սպասում են»,- ասաց նա:

Զոհրաբյանի խոսքով` վիզայի կենտրոնը ներդրվեց, իբր դեսպանատներում հերթերի գոյացումը կանխելու համար, սակայն այդ կենտրոններում մարդկանց գործերը «սկրեպով» միացնելու և հետո դեսպանատուն ուղարկելու համար լրացուցիչ գումար են ուզում, իսկ սկերպի գինը մոտ 12 հազար դրամ է: «Այսինքն՝ 30 000 դրամ են վճարում, որպեսզի սպասեն, որ 3-4 ժամ հետո հերթը գա, դրանցի հետո էլ չի ազատում դեսպանատուն գնալուց, մի հատ էլ նույն պրոցեսը անցնում են, էլի մի քանի ժամ սպասելով»,- ասաց նա:

Զոհրաբյանը, դիմելով ԱԳՆ-ին` ասաց, որ ԵՄ դեսպանության ներկայացուչության հետ պետք է նվաստացուցիչ գործընթացը կանխել և ճիշտ մեխանիզմներ գտնել: