«Քոչարյանը քաղաքականության մեջ է ճիշտ այնքան, որքան Լևոն Տեր-Պետրոսյանը»

ՀՀԿ խմբակցության պատգամավոր Խոսրով Հարությունյանն այն կարծիքին է, որ ՀՀ երկրորդ նախագահ Ռոբերտ Քոչարյանն անմիջականորեն չի մասնակցի գալիք խորհրդարանական ընտրություններին: Newspress.am-ի հետ զրույցում Խոսրով Հարությունյանն ասաց, որ ինքը, ճանաչելով Քոչարյանին, կասկածում է, որ նա կմասնակցի խորհրդարանական ընտրություններին:

Հարցին, թե Արմեն Գևորգյանի նշանակումն ԱԱԽ քարտուղարի պաշտոնում, Սամվել Բաբայանի վերադարձը, Վարդան Օսկանյանի կուսակցության ստեղծումն արդյոք չի՞ ուրվագծում Քոչարյանի վերադարձը ակտիվ քաղաքականություն, Խոսրով Հարությունյանը պատասխանեց. «Նախ ասեմ, որ Քոչարյանը քաղաքականությունից դուրս չի եկել, նա քաղաքականության մեջ է, հետևաբար այդ բանաձևը` վերադարձ քաղաքականություն, ինձ համար հասկանալի չէ: Քոչարյանը քաղաքականության մեջ է ճիշտ այնքան և այն չափով, որքանով քաղաքականության մեջ է Լևոն Տեր-Պետրոսյանը և որևէ խոշոր քաղաքական պետական գործիչ»,- ասաց Հարությունյանը:

Բացի այդ, Հարությունյանը համաձայն չէ, որ Արմեն Գևորգյանի նշանակումը կապ ունի Քոչարյանի հետ. «Օրինակ` Արմեն Գևորգյանի նշանակումը ես չէի կապում Օսկանյանի նոր բեմելի հետ, ես չէի կապի: Ես համոզված եմ` դրանք իրար հետ կապ չունեն: Մնացած բոլոր հնարավորությունները՝ ալյանսներ, աջակցություն, համակրանք՝ այդ թվում քաղաքական, ամեն ինչն էլ նորմալ է: Բայց այդ բոլորը մեկ հանգույցում չէի կապի»,- եզրափակեց Խոսրով Հարությունյանը: