«Կարգին հաղորդումն» ու բյուջեի կատարողականը` Նիկոլ Փաշինյանի համեմատությամբ

Խորհրդարանում 2015 թվականի պետական բյուջեի կատարողականի հաշվետվության ժամանակ ՀԱԿ խմբակցության պատգամավոր Նիկոլ Փաշինյանը բյուջեի կատարողականը համեմատեց «Կարգին հաղորդման» մանրապատումներից մեկի հետ.

««Կարգին հաղորդումը» հայտնի մանրապատում ունի, երբ հիմնանորոգվող բնակարանի սեփականատերը գալիս մտնում է նորոգվող տուն, տեսնում է` վերանորոգողը ոչինչ չի արել: Հարցնում է՝ Պետո, ի՞նչ ես արել, Պետոն ասում է՝ շեֆ ջան, բա եղա՞վ, լուսամուտը դրիմ, ասում է՝ լավ, բա հետո՞, ասում է՝ դե լուսամուտը դրի, ասում է՝ հա, հասկացանք հետո, ասում է` դե լուսամուտը դրիմ, դնելու պահին վերևից գաջ էր թափվել «подоконник»-ին, սիրուն լվացիմ, մաքրիմ, պլպլցրիմ, հիմա նայում ես՝ վա՜խ»,- ժպիտով ներկայացրեց Փաշինյանը՝ ներկայացնելով, թե ինչու է հիշել այս պատմությունը.

«Նայում եմ վերջին 4-5 տարվա բյուջեի կատարողականը, բոլոր տեղերում գրված է «Իրան-Հայաստան 400 կվտ լարման օդային գծի կառուցում», հիմա ի՞նչ է արվել 4 տարվա ընթացքում, բյուջեի կատարողականները որ կարդում ենք, կատարողականն ասում է՝ դե նախագիծը գծի, մրցույթ հայտարարի ու ոչ մի բան, ջրամբարների նախագիծն ուսումնասիրիմ, միջազգային մրցույթ հայտարարիմ, միջազգային խորհրդատուներ հրավիրիմ, բա լավ կոնկրետ ի՞նչ, կոնկրետ ոչ մի բան, գալիս ենք Իրան-Հայաստան երկաթուղի, ի՞նչ արեցիր կառավարություն ջան, դե հուշագիրը ստորագրիմ, գնացիմ, եկա… Հաջորդը՝ Հայաստան-Վրաստան 400 կվ լարման էլեկտրահաղորդման օդային գծի ծրագիրը, բա ի՞նչ արեցիր կառավարություն ջան, դե նախագիծը գծի…»,-ասաց պատգամավորը՝ դիմելով գլխավոր զեկուցող Ֆինանսների փոխնախարար Ատոմ Ջանջուղազյանին:

Ատոմ Ջանջուղազյանն արձագանքեց, որ հարցը գեղարվեստական մասով լավ էր համեմված, և ասաց, որ պատգամավորի բոլոր անդրադարձած հարցերին ծրագիրն իրականացնող մարմիններն իրենց պատասխանը տվել են, այլ հարց է, որ նրանց պատասխանը կարող է պատգամավորին չբավարարել: