Արամ Հարությունյանը կձերբակալվի՞

ՀՀ ջրային տնտեսության պետական կոմիտեի նախագահ Արամ Հարությունյանը հայտարարագրել է իր ունեցվածքը, ըստ որի, նրա դրամական միջոցները կազմել են 923 հազար 324 դոլար և 2 հազար 244 եվրո:

Բնապահպանության նախկին նախարարը հայտարարագրել է երեք ձեռնարկությունում մոտ 13 մլն դրամ արժողությամբ բաժնետոմս, իսկ որպես եկամուտ հայտարարագրել է վարձակալությունից ստացված 2 մլն 300 հազար դրամ, 2 մլն 225 հազար դրամ էլ իբրև շահաբաժինը, 5 մլն 533 հազար դրամ էլ տրված փոխառությունների դիմաց ստացված տոկոսավճար:

Նշենք, որ վերջերս մամուլում շրջանառվում էր, որ Արամ Հարությունյանն ընդգրկված է օֆշորում գրանցված ընկերությունների ցուցակում, որին ի պատասխան` Արամ Հարությունյանը հայտարարում էր, որ եթե անգամ այդ ցուցակում Հայաստանի որևէ քաղաքացի կա՝ Արամ Հարությունյան անունով, ապա նրա հետ ես ոչ մի առնչություն չունեմ: Այսքանը:

Մամուլը դեռևս 2014թ. էր գրել Լոնդոնում թանկարժեք անշարժ գույք ձեռք բերելու` այն ժամանակ դեռևս Կոտայքի մարզպետ Արամ Հարությունյանի ձեռքբերման մասին:

«Հրապարակ» թերթի տեղեկություններով` քննչական ծառայությունը դեռևս 2015թ. օգոստոսից քննում է գործարար Սիլվա Համբարձումյանի հաղորդումը, որտեղ նա հայտնել է, որ 2008թ. 10 հանքի շահագործման լիցենզիա ստանալու համար 14 մլն. դոլար կաշառք է տվել բնապահպանության նախարար Հարությունյանին։ Էներգետիկայի և բնական պաշարների նախարար Արմեն Մովսիսյանը կասեցրել է լիցենզիաները, Արամ Հարությունյանն էլ ձեռքերը լվացել է, ինչից հետո տիկինը դիմել է իրավապահներին։ Այս գործի մասին տեղյակ է նաև Սերժ Սարգսյանը, որը ՀՔԾ-ին հանձնարարել է քննել՝ օրենքի տառը պահպանելով։ Մոտ 1 տարվա քննությունից հետո, այժմ նոր զարգացումներ են սպասվում, այդ թվում՝ ձերբակալություններ։

Թեև 14 մլն դոլարի կաշառքը ևս Արամ Հարությունյանը հերքել է, սակայն, կարծես թե Արամ Հարությունյանի անվան շուրջ ինչ-որ աշխույժ ֆինանսական իրարանցում է. կա’մ կաշառք է, կա’մ օֆշոր, կա’մ թանկարժեք ձեռքբերում: Չմոռանանք, որ Արամ Հարությունյանը երկար տարիներ զբաղեցրել է ՀՀ բնապահպանության նախարարի պաշտոնը, որը համարվում է եկամտաբեր նախարարական պորտֆելներից մեկը:

Նշենք, որ ցանկացած այլ երկրում նման հարուստ կենսագրություն ունեցող պաշտոնյայով ոչ միայն իրավապահները վաղուց զբաղված կլինեին, այլև այլ պետական պաշտոններ հաստատ չէր վարի և ըստ երկրի ավանդույթների` համապատասխան պատիժներ կկիրառվեր: Իսկ եթե որևէ պաշտոնյայի շուրջ օղակը նեղանում է, ապա դա ոչ թե կապված է նրա ֆինանսական, այլ պաշտոնական մեղքերի հետ: