Կենտրոնական բանկն ստիպել է կառավարությանը գնալ անկման. Հրանտ Բագրատյանը՝ Արթուր Ջավադյանին

Խորհրդարանում շարունակվում է ընթանալ 2015 թվականի բյուջեի կատարողականի քննարկումը, որի շրջանակներում հարակից զեկուցող, ԿԲ նախագահ Արթուր Ջավադյանին հարցեր ուղղեց ՀԱԿ խմբակցության պատգամավոր Հրանտ Բագրատյանը: Պատգամավորը նկատեց, որ
բյուջեն եկամուտների մասով չի կատարվել առնվազն 7 տոկոս: Ինչ վերաբերում է տնտեսական աճին, ապա տնտեսական աճը տարերային
ոլորտներում է, որտեղ էլ գոյություն ունի տարերային վիճակագրություն, և ոչ մի կերպ չես կարող փաստել այդպես է, թե չէ:

Բագրատյանը նշեց, որ հնարավոր չէ, որ արտադրությունն ավելանար երեք տոկոս, եկամուտն ավելանար, իսկ առևտուրը պակասեր 8 տոկոսով, իսկ ներմուծումն ու արտահանումը` 22 տոկոսով:

«Իմ կարծիքով` 2015 թվականը եղել է տնտեսական անկման տարի, և դրա մեղավորներից մեկը Կենտրոնական բանկն է: 2014-ի ավարտին դուք մտցրիք պարտադիր պահուստավորում վարկավորման նկատմամբ: Դուք մինչև հիմա պահում եք, դուք արգելում եք տնտեսությունը վարկավորել և դրա շնորհիվ եք պահում դրամի կուրսը: Այն, որ վերաֆինանսավորման տոկոսադրույքը 10-ից իջեցվեց 7.75-ի, ապա դա ոչինչ է ձեր կատարած գործողության նկատմամբ: Վարկավորումը 3.2 տոկոս պակաս է եղել 2015-ին, քան 2014-ին: Կենտրոնական բանկը ստիպել է Կառավարությանը գնալ անկման: Ե՞րբ եք թույլ տալու, որ տնտեսությունն աճի: Ասում եք՝ ավանդներն ավելացել են 11 տոկոս, վարկերը պակասել են: Իրականում ավանդները չեն ավելացել , ի՞նչ եք մտադիր անել այս տարի, ինչքա՞ն եք շարունակելու տրված վարկերի նկատմամբ պահուստավորում անել, այդ գնով կուրսը պահելուն»:

ՀՀ ԿԲ նախագահ Արթուր Ջավադյանն ի պատասխան պատգամավորի` ասաց, որ ԿԲ-ն դրամի կուրսի պահմանն ուղղված որևէ գործողություն չի իրականացրել, այլ մշտապես պահպանում է ազատ լողացող փոխարժեքի քաղաքականությունը, և միջամտում է, երբ դրա անհրաժեշտությունը կա, այսինքն` կտրուկ տատանումներ են լինելու:

Ինչ վերաբերում է պարտադիր պահուստավորմանը` Ջավադյանն ասաց. «2014-ի ճգնաժամի արդյունքում մենք բարձրացրինք տոկոսադրույքները հիմնականում երկու գործիքով. լոմբարդային ռեպոյի տոկոսադրույքը բարձրացրինք և պարտադիր պահուստավորման, որը հնարավորություն տվեց ապահովել նաև ֆինանսական կայունությունը:

Դրանից հետո լոմբարտային ռեպոն բերեցինք իր չափի մեջ և բանկերին հնարվորություն տվեցինք պահուստավորելու փողերը:

Ավանդներին վերաբերող հարցին ի պատասխան` Ջավադյանն ասաց, որ մեր դրամային ավանդներն ընդհանուր վարկային կառուցվածքում կազմում են ընդհանուր ավանդների մոտ 28 տոկոսը, իսկ մնացածն արտարժույթային ավանդներն են:« Վարկերի նվազումն էլ կախված է փոխարժեքի հետ, իսկ այդտեղ գրեթե փոխարժեքի փոփոխություն չի եղել, իսկ այս պահին վարկերի աճ ունենք, և ամենակարևորը սպառողական վարկերը կրճատվել են, բիզնեսին տրվող վարկերն աճել են»,- ասաց Ջավադյանը:

Հրանտ Բագրատյանն իր արձագանքում ասաց, որ կարևորն այն է, որ Ջավադյանի խոսքից բխում է, որ ինքն ազդում է փոխարժեքի վրա, անմիջապես չէ, բայց ազդում է: