26.5 %-ով ներկրման ծավալների կրճատումն անկանխատեսելի է. Միքայել Մելքումյան

Խորհրդարանում քննարկվում է 2015թ. բյուջեի կատարողականը: ԲՀԿ խմբակցության պատգմավոր Միքայել Մելքումյանը խոսքն ուղղելով հիմնական զեկուցող Ֆինանսների նախարարի տեղակալ, գլխավոր գանձապետ Ատոմ Ջանջուղազյանին` ասաց, որ կանխատեսումներում մեծ շեղումներ են եղել: 26.5 %-ով ներկրման ծավալների կրճատումը Մելքումյանը որակեց անկանխատեսելի երևույթ:

«Էլ չեմ ասում արտահանման ծավալները. մեկ՝ 3,9% եք ասել, մեկ՝ 4,9, ճշտեք` հիմա որն է և նաև ընդհանուր շրջանառության ծավալի 20, 6 տոկոսի կարճատումը»,- ասաց Մելքումյանն ու հավելեց, որ հարկաբյուջետային քաղաքականության արդյունավետությունն իջել է: Միքայել Մելքումյանը նշեց, թե անցյալ տարի 80%-ով հարկեր քիչ են հավաքագրվել, որը մասսամբ` 100 մլն դոլար վարկի ներկրումով է կոմպենսացվել:

«Ձեր կանխատեսումը, նայում եմ, բյուջետային ուղերձից, ռիսկային գնահատման մասով ընդամենը տված է 17, 9 մլրդ դրամի ռիսկ, որից նշել եք 10% ներկրման կրճատման դեպքում, երբ ասացի` 26,5 %-ով է իջել, մյուսը 3% կետով ՀՆԱ-ի կրճատում, բայց եղել է 4,1%»,- մատնանշեց նա:

Ջանջուղազյանն ասաց, որ արտահանման ծավալների մասով 3,9% է եղել, ինչ վերաբերում է բյուջեի եկամուտների թերակատարմանը, ապա գլխավոր գանձապետը համաձայնեց պատգամավորի հետ, սակայն վերապահումով.

«Համաձայնեք, որ այստեղ խոսքը ոչ թե իրական աճին է վերաբերում, այլ անվանական մեծությամբ փոփոխության ներքին արդյունքին, որը լրացնում է եկամուտները, այդ տեսակետից ունեցել են 4,2% աճ»,-ասաց նա:

Ջանջուղազյանի խոսքով՝ ծրագրային շեղումն էլ պայմանավորված է եղել մոտեցման առանձնահատկությունից, ըստ որի փորձել են տարանջատել ներմուծումից գոյացող հարկերն այն հարկերից, որոնք ներքին շրջանառության արդյունք են:

«26,5%-ը, միանգամայն իրավացի եք, դոլարով արտահայտված ներմուծման կրճատումն է, իսկ դրամային ցուցանիշով այն կազմել է 18, 5%»,- ասաց նա: