Ժառանգներին փոխհատուցում չեն տալիս, բյուջեի կատարողականում գրում են, որ փոխհատուցել են

ՀՀ Ազգային ժողովում ընթանում է 2015 թվականի պետական բյուջեի կատարողականի քննարկումը, որի հիմնական զեկուցողը Ֆինանսների նախարարի տեղակալ, գլխավոր գանձապետ Ատոմ Ջանջուղազյանն է:

ԱԺ անկախ պատգամավոր Էդմոն Մարուքյանին հետաքրքրում էր ավանդների փոխհատուցման ծրագիրը: Ըստ պատգամավորի՝ պետությունն ավանդները քաղաքացիներին չի վերադարձնում, իսկ բյուջեի կատարողականում նշվում է, որ պետությունն ինչ-որ չափով վերադարձրել է գումարները:

«Երբ մահանում է մարդը, ով պետք է ավանդ ստանար, նրանից հետո ժառանգը չի կարող ստանալ, չնայած այդտեղ իրավական խնդիր կա, եթե ավանդը պետությունը չի վերադարձնում, ինչպե՞ս է բյուջեի մեջ ամեն տարի նշվում, թե ավանդ է փոխանցվել: Եթե ժառանգներին չեք տալիս, ուրեմն պետության պարտավորությունը մնում է այնքան, որքան կա: Մի կողմից մարդկանց ավանդը չենք վերադարձնում, մյուս կողմից` թաքուն մի տող է գրած, որ պետական պարտքը մարել ենք»,-  նկատեց Մարուքյանը:

Ատոմ Ջանջուղազյանը չհամաձայնեց: Գլխավոր գանձապետի խոսքով՝ պետական պարքտը սահմանված է Օրենսդրությամբ, իսկ փաստաթղթում պատգամավորի նշած պարտավորությունները ներառված չեն և չեն դիտարկվում որպես պետական պարտքի մաս:

Մարուքյանն արձանագրեց , որ եթե պետությունը պարտավորություն ունի քաղաքացու նկատմամբ, մահանալու դեպքում էլ պարտավոր է ժառանգներին փոխանցել:

«Մենք ժառանգին չենք տալիս, բայց կատարողականում գրում ենք, որ էս մարդկանց նկատմամբ պարտավորությունները կատարել ենք»,- ասաց Մարուքյանը: