Սամվել Ալեքսանյանի կանաչ կոճակն` իշխանությանը, կարմիրն` ընդդիմությանը, 500 եվրոն` լրագրողից

Ազգային ժողովի գործարար-պատգամավոր Սամվել Ալեքսանյանի պատգամավորական գործունեությունից ո′չ ամբիոնը կհիշվի, ո′չ հարցերը, ո′չ օրակարգին խառնվելը, ոչինչ: Միակ բանը, որ նա Ազգային ժողովի ներսում անում է որպես պատգամավոր, կանաչ կոճակ սեղմելն է իշխանության առաջարկին, կարմիր կոճակ սեղմելը՝ ընդդիմության: Վերջ, Սամվել Ալեքսանյանը քաջ գիտի իր անելիքը և դրա համար կրում է պատգամավորի մանդատը:

Բայց 2012-ից հետո Սամվել Ալեքսանյանը մի կարևոր բան էլ է անում: Նա նույնիսկ մտածել է ինչպես դա անել: Իրեն հռչակել է Ազգային ժողովի «հոլիվուդյան աստղը» և հարցազրույց տալու համար 500 եվրո գումար է պահանջում:

Սամվել Ալեքսանյանն անկեղծ մտածում է, որ ինքը կարևոր ասելիք ունի ու դրա համար են լրագրողները մոտենում իրեն, լավ, թող այդպես էլ մտածի:

Տարօրինակ է, սակայն, որ Սամվել Ալեքսանյանին որևէ իշխանական կառույց չի մեղադրում լրագրողներից, այսպես ասած, «գումար շորթելու» փորձի մեջ: Գործարար պատգամավորը բացեիբաց ասում է` կխոսի միայն 500 եվրոյի դիմաց: Բայց պատգամավորը նույնիսկ մոռանում է, որ Հայաստանում չի կարելի արտարժույթով «գործարք» կատարել: