Կաշառք և գործարքներ` Վարդան Այվազյանի և Արամ Հարությունյանի հետ

«Հրապարակ» թերթը գրել է, որ Հատուկ քննչական ծառայությունը դեռևս 2015թ. օգոստոսից քննում է գործարար Սիլվա Համբարձումյանի հաղորդումը, որտեղ նա հայտնել է, որ 2008թ. 10 հանքի շահագործման լիցենզիա ստանալու համար 14 մլն. դոլար կաշառք է տվել բնապահպանության նախարար Հարությունյանին։

Էներգետիկայի և բնական պաշարների նախարար Արմեն Մովսիսյանը կասեցրել էր լիցենզիաները, Արամ Հարությունյանն էլ ձեռքերը լվացել է, ինչից հետո տիկինը դիմել է իրավապահներին։ Գործով ապացույցներ են ձեռք բերվել, որոնք վկայում են խոշոր չափի գումարի մուտքն ու ելքը։ Այս գործի մասին տեղյակ է նաև Սերժ Սարգսյանը, որը ՀՔԾ-ին հանձնարարել է քննել՝ օրենքի տառը պահպանելով։ Մոտ 1 տարվա քննությունից հետո այժմ նոր զարգացումներ են սպասվում, այդ թվում՝ ձերբակալություններ:

Քննիչներն ապացուցել են ութ միլիոն կաշառքի փաստը, որ գործարար Սիլվա Համբարձումյանը տվել է Արամ Հարությունյանին` Դուբայում, վեց միլիոնը` Երևանում:

Նշենք, որ այստեղ խնդիրը ոչ միայն այն է, որ Արամ Հարությունյանը 14 մլն դոլարի կաշառք է վերցրել, սա քննարկելու այլ խնդիր է, այլ նաև այն, որ Սիլվա Համբարձումյանը, հասկանալով, որ հանցանք է գործում` կաշառք է տվել:

Այսինքն` յուրաքանչյուրս մեր արդարության ըմբռնումն ունենք, կարող ենք միտումներով կաշառք առաջարկել, ու չստանալու դեպքում դիմել իրավապահներին և խոսել արդարության մասին, իսկ եթե Արմեն Մովսիսյանը չկասեցնե՞ր լիցենզիաները: Սիլվա Համբարձումյանը հանգիստ կշահագործեր հանքերը և, ինչպես ասում են, օֆ էլ չէր քաշի:

Հիշեցնենք, որ դեռևս նախորդ տարի Սիլվա Համբարձումյանը պնդում էր, որ ԱԺ պատգամավոր Վարդան Այվազյանն իրեն 70 հազար դոլար պարտք է։

Ըստ տեղեկությունների` Վ. Այվազյանը «Ջրկապ» հանքավայրը վաճառել է Սիլվա Համբարձումյանին 500 հազար դոլարով: Հետո պարզվել էր, որ հանքավայրի անունն ուրիշ տեղ է, իսկ կոորդինատների տակ հանք չկա։ Ս. Համբարձումյանը վերադարձրել է փաստաթղթերը, իսկ Վարդան Այվազյանը վերադարձրել է 500 000 դոլարը, սակայն 70 հազար դոլարը պարտք է մնացել:

Իսկ 2011թ. գործարար Սիլվա Համբարձումյանը ՀՀ հատուկ քննչական ծառայությունում գրավոր հաղորդում էր ներկայացրել այն մասին, որ 2011 թվականի նոյեմբերի 14-ին, «Արմենիա Մարիոթ» հյուրանոցի սրճարանում, Սյունիքի մարզպետ Սուրիկ Խաչատրյանն իրեն ծեծի է ենթարկել: Նույն օրը ՀՔԾ-ում հարուցվել էր քրեական գործ:

Հիշեցնենք, որ ՀՔԾ-ում ևս մեկ գործ է հարուցված Համբարձումյանի այն բողոքի կապակցությամբ, ըստ որի` Սուրիկ Խաչատրյանը իրենից գողացել է 102 միլիոն դրամ արժողությամբ սարքավորում:

Հայաստանում, ինչպես երևում է, գործարարության բաղադրիչն է կաշառքն ու ՀՔԾ-ում հաղորդում տալը, երբ բիզնեսը ցանկալի հունով չի ընթանում: